پشاور، ایم ایم اے کا پاور شو

اسلام ٹائمز۔ متحدہ مجلس عمل نے انتخابی مہم کے سلسلے میں پشاور کے رنگ روڈ میں پنڈال سجایا، جس سے امیر جماعت اسلامی سراج الحق، جمعیت علمائے اسلام (ف) کے رہنما مولانا فضل الرحمٰن، ڈپٹی جنرل سیکرٹری ایم ایم اے علامہ عارف واحدی و دیگر نے خطاب کیا۔ ایم ایم اے کے صدر مولانا فضل الرحمٰن نے کہا کہ ترک صدر رجب طیب اردگان کو دوبارہ ترکی کا صدر منتخب ہونے پر مبارکباد پیش کرتا ہوں، اگر تبدیلی لانی ہے تو ملک میں اسلام کا پرچم بلند کرنا ہوگا، ہم اپنی شناخت کو پوری دنیا کے سامنے لانا چاہتے ہیں۔ انہوں نے کہا کہ ہماری آزادی ہم سے چھینی جا رہی ہے، اگر عالمی قوتیں ہمیں پھر سے اندھیرے میں دھکیلنا چاہتی ہیں تو آپ یہ چیلنج قبول کریں۔ مولانا فضل الرحمٰن نے کہا کہ جو لوگ ہمارے مقابلے میں ہیں وہ مغربی نظریہ رکھتے ہیں، ہم اپنی حیا اور روایات کا دفاع کرنا جانتے ہیں، مغرب پھر سے ہمیں غلام بنانا چاہتا ہے، ہمیں اپنی صفوں کو منظم کرنا ہے۔ جلسے سے خطاب میں امیر جماعت اسلامی سراج الحق نے کہا کہ ایم ایم اے کو ایک دن کی حکومت بھی ملی تو وہ شریعت کی حکومت ہوگی۔ سراج الحق نے کہا کہ ہم کامیاب ہو کر پاکستان کو کلین پاکستان بنائیں گے، حقیقی جمہوریت کی ضرورت ہے لوٹا کریسی کی نہیں۔

ایم ایم اے کے سینئر نائب صدر سراج الحق نے کہا کہ آنے والا کل روشن ہے، اندھیر نگری کا نہیں ہے، اس ملک کو آئین کی روشنی میں خوشحال بنانا چاہتے ہیں۔ سراج الحق نے کہا کہ اگر طیب اردگان ترکی میں جیت گئے تو ایم ایم اے پاکستان میں جیتے گی، یہاں ڈرگ اور کرپٹ مافیا کو شکست ہوگی، میرے قافلے میں جو جماعتیں شامل ہیں ان کا نام پاناما میں نہیں ہے۔ انہوں نے کہا کہ ملک میں لوٹا کریسی کی نہیں ڈیمو کریسی کی ضرورت ہے، نیب کرپٹ لوگوں کا احتساب نہیں کرسکا، عوام کریں گے، دفاع کے بعد تعلیم پر خرچ کریں گے۔ سراج الحق نے کہا کہ ڈھائی کروڑ بچے تعلیم سے دور ہیں، موقع ملا تو پاکستان کے ہر بچے کے ہاتھ میں کتاب اور کاپیاں دیں گے، تمام بے روزگار نوجوانوں کو روزگار الاؤنس دیں گے۔ امیر جماعت اسلامی نے کہا کہ 25 جولائی کو ہم جیتیں گے، پھر مل کر فلسطین، کشمیر کی آزادی کیلئے کام کریں گے، ڈاکٹر عافیہ کی رہائی کیلئے سرتوڑ کوشش کریں گے، ڈاکٹر عافیہ کی رہائی کیلئے کروڑوں لوگ بے چین ہیں۔