اسلام ٹائمز۔ ملک بھر کی طرح کراچی میں بھی آج 25 جولائی کو قومی اور صوبائی اسمبلی کی نشستوں کیلئے پولنگ ہوئی۔ کراچی میں پولنگ کا عمل صبح 8 بجے سے شروع ہو کر شام 6 بجے تک جاری رہا۔ شہر میں پُرامن ماحول میں پولنگ ہوئی اور اس موقع پر سیکورٹی کے سخت انتظامات کئے گئے تھے۔ وقت گزرنے کے ساتھ ساتھ پولنگ اسٹیشنوں پر ووٹرز کا رش بڑھتا رہا۔ پولنگ کا وقت ختم ہونے کے بعد پولنگ اسٹشینوں کے باہر موجود ووٹرز اپنا حق رائے دہی استعمال نہیں کر سکے، جبکہ جو پولنگ اسٹیشن کے اندر موجود تھے، ان کو ووٹ کاسٹ کرنے دیا گیا۔ کراچی میں قومی اسمبلی 21 اور سندھ اسمبلی 43 نشستوں کیلئے پولنگ ہوئی، جس مجموعی طور پر 1223 امیدواروں نے حصہ لیا تھا۔ پولنگ اسٹیشن کے اندر اور باہر پولیس اہلکاروں کے ساتھ ساتھ رینجرز اور فوج کے اہلکار بھی تعینات تھے۔ سیاسی جماعتوں کے کارکنان کی جانب سے پولنگ اسٹیشن کے کچھ فاصلے پر اپنے اہنے کیمپ بھی لگائے گئے تھے، جہاں پر ووٹرز کو ان کے ووٹ کے متعلق آگاہی فراہم کی جا رہی تھی۔ پولنگ کیمپوں کے باعث سیاسی گہماگہمی نظر آرہی تھی۔ پولنگ کے عمل میں ہر طبقہ ہائے فکر سے تعلق رکھنے والے افراد نے شرکت کی مردوں کے ساتھ ساتھ خواتین، بزرگ مرد اور برزگ خواتین بھی ووٹ ڈالنے پولنگ اسٹیشن پہنچے۔ کئی بزرگ افراد وہیل چیئر پر ووٹ ڈالنے آئے اور افراد بیماری کی حالت ووٹ پولنگ اسٹیشن پہنچے۔
