اسلام ٹائمز۔ مجلس وحدت مسلمین سندھ کی جانب سے سیاسی و مذہبی جماعتوں، صحافی برادری و دیگر کیلئے کراچی کیتھولک کلب میں نیاز حلیم کا اہتمام کیا گیا۔ نیاز حلیم میں پاکستان پیپلز پارٹی سندھ کے جنرل سیکریٹری وقار مہدی، راشد ربانی، فرید انصاری، سلیم سچوانی، پاکستان تحریک انصاف کے رکن صوبائی اسمبلی محمد علی عزیز، جمال صدیقی، کاشف علی، سید امیر حسین، پاکستان عوامی تحریک کے ظفر اقبال قادری، صدر کراچی پریس کلب احمد ملک، مذہبی اسکالر مولانا منظر الحق تھانوی، علامہ سجاد شبیر، پیر مقدس کاظمی سجادہ نشین بری امام، علامہ مرزا یوسف حسین، علامہ مقصود ڈومکی، علی حسین نقوی، علامہ صادق جعفری، علامہ مبشر حسن، علامہ علی انور جعفری، آصف صفوی، احسن عباس، ناصر حسینی سمیت دیگر سماجی شخصیات، مساجد و امام بارگاہوں کے ٹرسٹیز، ماتمی انجمنوں، اسکاوٹس گروپس، پرنٹ و الیکٹرانک میڈیا کے نمائندگان موجود تھے۔
اس موقع پر خطاب کرتے ہوئے مجلس وحدت مسلمین کے مرکزی ڈپٹی سیکرٹری جنرل علامہ احمد اقبال رضوی نے نیاز حلیم میں شرکت کرنے والی تمام سیاسی و مذہبی شخصیات سمیت میڈیا نمائندگان کا شکریہ ادا کیا اور کہا کہ ملک میں حسینی ثقافت کو اجاگر کیا جاتا تو آج ملک میں دہشتگردی نہ ہوتی، عالمی استعماری قوتیں ملک میں عدم استحکام پھیلانا چاہتی ہیں، کشمیر، فلسطین، اور یمن میں ہونے والی دہشتگردی کی مذمت کرتے ہیں، عرب ممالک عالمی استعماری قوتوں کے ایماء پر اپنے ہی مسلمان بھائیوں کی خونریزی کررہے ہیں اور یہ آگ اب عرب ممالک سے بڑھتی ہوئی مملکت خداد پاکستان تک آپہنچی ہے۔ انہوں نے کہا کہ پاکستان میں کسی بھی استعماری ایجنڈے کو وطن عزیز میں کامیاب نہیں ہونے دیں گے، انشاءاللہ شیعہ و سنی مل کر ملک میں موجود تکفیری دہشتگردوں کو شکست دیں گے۔
