اسلام ٹائمز۔ جمعیت علماء اسلام (س) کے سربراہ مولانا سمیع الحق کی نماز جنازہ اکوڑہ خٹک کے خوشحال ڈگری کالج میں ادا کی گئی، نماز جنازہ میں اسپیکر قومی اسمبلی اسد قیصر، وزیراعلٰی خیبر پختونخوا محمود خان، گورنر شاہ فرمان، نواز لیگ کے راجہ ظفر الحق، اقبال ظفر جھگڑا، جماعت اسلامی کے سربراہ سینٹر سراج الحق، سیکرٹری جنرل لیاقت بلوچ سمیت دیگر سیاسی جماعتوں کے رہنماﺅں اور ہزاروں افراد نے شرکت کی۔ مولانا سمیع الحق کی نماز جنازہ ان کے بھائی مولانا انور الحق نے پڑھائی، اس موقع پر سکیورٹی کے سخت انتظامات کئے گئے تھے۔ جے یو آئی (س)کے سربراہ مولانا سمیع الحق کی نماز جنازہ میں سیاسی و مذہبی جماعتوں کے رہنماﺅں اور دیگر شخصیات نے شرکت کی۔ انہیں مدرسہ حقانیہ اکوڑہ خٹک میں ان کے والد مولانا عبدالحق کے پہلو میں سپرد خاک کیا گیا۔ تعزیت اور جنازے کے لئے ملک بھر اور افغانستان سے بھی مدرسے کے طلبہ کی بڑی تعداد پہنچی۔ پولیس کے ساتھ مدرسہ کے طلباء نے بھی سکیورٹی کے فرائض سرانجام دیئے۔
