QR Code

ملتان، ایم ڈبلیو ایم کے زیراہتمام عید میلادالنبی(ص) ریلی

23 Nov 2018 21:51

ریلی سے خطاب کرتے ہوئے ایم ڈبلیو ایم جنوبی پنجاب کے سیکرٹری جنرل کا کہنا تھا کہ ہمیں رسول خدا کی محبت میں ایک ہونیکی ضرورت ہے، آج دشمن نے پھر پاکستان کو لہو لہان کر دیا، کراچی اور ہنگو میں 30 سے زائد افراد شہید ہوئے ہیں، دہشتگرد کسی بھی صورت اسلام کی خدمت نہیں کر رہے ہیں، ہم کراچی میں شہید ہونیوالے پولیس کے شہداء اور ہنگو میں شہید ہونیوالی عوام کے دکھ میں برابر کے شریک ہیں۔

اسلام ٹائمز۔ مجلس وحدت مسلمین ملتان کے زیراہتمام نماز جمعہ کے بعد جامع مسجد الحسین نیوملتان سے جشن عید میلادالنبی(ص) ریلی نکالی گئی، ریلی کی قیادت مجلس وحدت مسلمین جنوبی پنجاب کے سیکرٹری جنرل علامہ سید اقتدار حسین نقوی، علامہ غلام مصطفیٰ انصاری، سلیم عباس صدیقی، مہر سخاوت علی، ضلعی سیکرٹری جنرل مرزا وجاہت علی، مولانا عمران ظفر، مولانا ہادی حسین ہادی، متحدہ میلاد کونسل کے رہنمائوں زاہد بلال قریشی، رکن الدین حامدی، رائو محمد عارف رضوی، پاکستان عوامی تحریک کے رہنما میجر اقبال چغتائی، سید وسیم عباس زیدی، سید محمد علی کاظمی سمیت دیگر نے کی۔ ریلی کا جگہ جگہ پر گل پاشی کے ذریعے استقبال کیا گیا، ریلی اپنے سابقہ راستوں سے ہوتی دولت گیٹ چوک پہنچی، جہاں پر عوام کی جانب سے شاندار استقبال کیا گیا، ریلی میں خانہ کعبہ اور مسجد نبوی کے ماڈل توجہ کا مرکز رہے۔ ریلی کے شرکاء سے خطاب کرتے ہوئے علامہ اقتدار نقوی نے کہا کہ ملک کو اس وقت اتحاد و وحدت کی اشد ضرورت ہے، رسول خدا کی ذات تمام عالم اسلام کے لئے نقطہ اتحاد ہے، ہمیں رسول خدا کی محبت میں ایک ہونے کی ضرورت ہے، آج دشمن نے پھر پاکستان کو لہو لہان کر دیا، کراچی اور ہنگو میں 30 سے زائد افراد شہید ہوئے ہیں، دہشتگرد کسی بھی صورت اسلام کی خدمت نہیں کر رہے ہیں، ہم کراچی میں شہید ہونے والے پولیس کے شہداء اور ہنگو میں شہید ہونے والی عوام کے دکھ میں برابر کے شریک ہیں۔ ریلی سے خطاب کرتے ہوئے متحدہ میلاد کونسل کے رہنمائوں کا کہنا تھا کہ الحمداللہ ہر سال عاشقان مصطفیٰ کے جوش و جذبے اور ولولے میں اضافہ نظر آرہا ہے، متحدہ میلاد کونسل ایم ڈبلیو ایم کی جانب سے میلادالنبی ریلی کے انعقاد پر مبارکباد پیش کرتی ہے، ہمیں اس شہر اور ملک کو خوبصورت بنانے کے لئے اسی اخوت اور محبت کی ضرورت ہے، ہم عاشقان مصطفیٰ کے خادم ہیں، 12ربیع الاول کے موقع پر اہلیان ملتان نے جس محبت اور عقیدت کا اظہار کیا ہے، وہ لائق تحسین ہے۔ ریلی دولت گیٹ چوک، حسین آگاہی بازار سے ہوتی ہوئی چوک گھنٹہ پر اختتام پذیر ہوئی، ایم ڈبلیو ایم جنوبی پنجاب کے ڈپٹی سیکرٹری جنرل سلیم عباس صدیقی کا کہنا تھا کہ شیعہ سنی وحدت وقت کی اہم ضرورت ہے، ہم اس ملک میں شیعہ سنی وحدت کے لئے اپنا کردار ادا کرتے رہیں گے، حکومت کی جانب سے عید میلادالنبی کے موقع پر انتظامات قابل تحسین ہیں۔

خبر کا کوڈ: 762853