اسلام ٹائمز۔ سکردو ایئر پورٹ سے 20 منٹ کی مسافت پر واقع مناظر قدرت کے شاہکار نظاروں پر مشتمل سحر انگیز وادی '' چنداہ'' واقع ہے، وادی چنداہ گمبہ سکردو کے بالائی پہاڑی کے دامن میں واقع ایک نہایت دل فریب جگہ ہے، سکردو شہر سے ایک گھنٹہ جبکہ گمبہ سکردو ایئر پورٹ سے بیس منٹ کی مسافت پر واقع ہے، یہ گاؤں سکردو کی خوبصورت ترین وادیوں میں شمار ہوتا ہے۔ پہاڑوں کے دامن میں واقع ہونے کی وجہ سے سردیوں میں موسم سرد اور گرمیوں میں معتدل رہتا ہے۔ وادی کے اطراف میں پہاڑ ساتھ ہی گلیشئر، چشمے اور باغات قابل دید ہیں۔ چنداہ کے شمال اور جنوب میں موجود چوٹیوں پر پتھروں کے درمیان چھوٹے چھوٹے غار اور انسان نما مجسمے بھی جابجا دیکھنے کو ملیں گے۔
