اسلام ٹائمز - شیخ زکزکی کی گرفتاری کیخلاف سندھ بھر میں احتجاج

شیخ زکزکی کی گرفتاری کیخلاف سندھ بھر میں احتجاج

ملک بھر کی طرح سندھ کے مختلف اضلاع کراچی، حیدرآباد، سجاول، ٹھٹھہ، نواب شاہ، ٹنڈو محمد خان، بدین، ماتلی، نوشہرو فیروز، مٹیاری، دادو، خیرپور، گھوٹکی، شکارپور، جیکب آباد، لاڑکانہ، سکھر، کندھ کوٹ اور دیگر میں بھی بھرپور یوم احتجاجی اجتماعات منعقد کئے گئے، جس سے خطاب میں مقررین نے کہا کہ شیخ ابرہیم زکزکی کو فوری رہا کیا جائے، ان کی قید غیر انسانی و عالمی قوانین کے خلاف ہے۔

اسلام ٹائمز۔ اسلامک موومنٹ آف نائیجیریا کے سربراہ آیت اللہ شیخ ابراہیم زکزکی اور ان کی اہلیہ کی بلاجواز گرفتاری اور انہیں دوران قید زہر دینے کے خلاف مجلس وحدت مسلمین پاکستان کے سربراہ علامہ راجہ ناصر عباس جعفری کی اپیل پر ملک بھر میں پرامن یوم احتجاج منایا گیا۔ چاروں صوبوں، گلگت بلتستان، آزاد جموں و کشمیر کے مختلف شہروں میں احتجاجی مظاہرے کئے گئے اور ریلیاں نکالی گئیں۔ ملک بھر کی طرح سندھ کے مختلف اضلاع کراچی، حیدرآباد، سجاول، ٹھٹھہ، نواب شاہ، ٹنڈو محمد خان، بدین، ماتلی، نوشہرو فیروز، مٹیاری، دادو، خیرپور، گھوٹکی، شکارپور، جیکب آباد، لاڑکانہ، سکھر، کندھ کوٹ اور دیگر میں بھی بھرپور یوم احتجاجی اجتماعات منعقد کئے گئے۔ ایم ڈبلیو ایم کراچی ڈویژن کے تحت خوجہ جامع مسجد کھارادر، جامع مسجد نورایمان ناظم آباد اور جامع مسجد حسینی ؑبرف خانہ ملیر کے باہر بعد نماز جمعہ احتجاجی مظاہرے منعقد کئے گئے، جن سے خطاب کرتے ہوئے علامہ سید باقر عباس زیدی، علامہ صادق جعفری، علامہ مبشر حسن، علامہ علی انور جعفری، علامہ نشان حیدر، میر تقی ظفر، ناصر حسینی و دیگر مقررین نے کہا کہ شیخ ابرہیم زکزکی کو فوری رہا کیا جائے، ان کی قید غیر انسانی و عالمی قوانین کے خلاف ہے۔