اسلام ٹائمز - کورین وفد کا دورہ خیبر پختونخوا

کورین سفیر کوانگ سونگ کیو نے کہا کہ ہمیں پشاور آکر بے حد خوشی ہوئی، یہاں آکر معلوم ہوا کہ بدھ مت کے کافی مقامات یہاں موجود ہیں، کوریا اور پاکستان کے درمیان تعلقات مزید مستحکم ہونگے، کورین حکومت پہلے بھی پاکستان سے بہت سے شعبے میں تعاون کرتی رہی ہے اور آئندہ بھی یہ تعاون جاری رہیگا۔

اسلام ٹائمز۔ کوریا کا 10 رکنی وفد تاریخی بدھ مقامات دیکھنے کیلئے خیبر پختونخوا پہنچ گیا۔ وفد نے عجائب گھر پشاور سمیت سوات اور تخت بھائی کا بھی دورہ کیا۔ 10 رکنی وفد کے پشاور پہنچنے پر وزیر سیاحت عاطف خان نے استقبال کیا، وفد نے بدھ مذہب کے پیروکاروں، ریسرچرز اور کورین یونیورسٹی کے پروفیسرز شامل ہیں۔ اس موقع پر کورین سفیر کوانگ سونگ کیو بھی موجود تھے۔ سینئر صوبائی وزیر عاطف خان نے اپنے خطاب میں کہا کہ خیبر پختونخوا میں بدھ مت کے حوالے سے ہزاروں مقامات ہیں جو دو سے ڈھائی ہزار سال پرانے ہیں اور ہم نے 2 ہزار مقامات کی نشاندہی کی، اس حوالے سے حکومت خصوصی مہم چلائی رہی تاکہ سیاحوں کے علاوہ مذہبی سیاحت کو بھی فروغ دیں۔ انہوں کہا کہ بدھ مت سائٹس کو محفوظ بنانے کیلئے بجٹ میں 600 ملین روپے مختص کئے ہیں تاکہ یہاں آنے والے غیر ملکی سیاح پاکستان کا مثبت چہرہ لے جائیں، مذہبی سیاحت کے سلسلے میں آنے والے وفود کی سکیورٹی، گائیڈ اور رہائش میں معاونت کیلئے حکومت تیار ہے۔ انہوں نے کہا کہ مختلف ممالک کے سفیروں سے رابطہ ہے، مختلف ممالک کے وفود آئیں گے، ستمبر میں ایک اور غیر ملکی وفد آئے گا، پاکستان میں تمام مذاہب کو عبادت کی آزادی ہے لیکن بھارت میں ایسا نہیں، ہندوستان میں مسلمانوں کے خلاف کارروائی ہو رہی ہے اسے روکا جائے۔ کورین سفیر کوانگ سونگ کیو نے کہا کہ ہمیں پشاور آکر بے حد خوشی ہوئی، یہاں آکر معلوم ہوا کہ بدھ مت کے کافی مقامات یہاں موجود ہیں، کوریا اور پاکستان کے درمیان تعلقات مزید مستحکم ہوں گے، کورین حکومت پہلے بھی پاکستان سے بہت سے شعبے میں تعاون کرتی رہی ہے اور آئندہ بھی یہ تعاون جاری رہے گا۔