اسلام ٹائمز - پاک فضائیہ کا میوزیم اور ابھی نندن

پاکستانی شاہینوں کا نشانہ بننے اور بعد ازاں گرفتار ہونے والے بھارتی ائیرفورس کے ونگ کمانڈر ابھی نندن کے مجسمے اور وردی کو کراچی کے پاک فضائیہ کے جنگی میوزیم میں لگادیا گیا۔ بھارت کیلئے عبرت کی داستان، ونگ کمانڈر ابھی نندن کا سامان تباہ شدہ جہاز کے باقیات ہوں یاں ابھی نندن کی وردی بھارتی پائلٹ کی گرفتاری کے بعد ضبط کی گئی یہ تمام چیزیں اب حصہ ہیں پی اے ایف میوزیم کراچی کا۔ میوزیم میں شکست خوردہ بھارتی پائلٹ کا مجسمہ بھی لگایا گیا ہے۔

اسلام ٹائمز۔ پاک فضائیہ کے شاہینوں نے 27 فروری 2019ء کی صبح فضائی حدود کی خلاف ورزی کرنے والےدو بھارتی لڑاکا طیاروں کو مار گرایا تھا جن میں سے ایک مگ 21 لڑاکا طیارہ پاکستان کی حدود میں گرا اور اس میں سوار بھارتی فضائیہ کے پائلٹ ونگ کمانڈر ابھی نندن کو زندہ مگر زخمی حالت میں گرفتار کیا گیا۔ پاک فوج کے جوانوں نے ابھی نندن کو مشتعل ہجوم سے بچاکر گرفتار کیا اور بعدازاں طبی امداد اور چائے پلانے کے بعد وزیراعظم عمران خان کے اعلان پر واہگہ کے راستے بھارت کے حوالے کردیا۔ دونوں بھارتی طیاروں میں سے ایک طیارہ اسکواڈرن لیڈر حسن صدیقی جب کہ دوسرا ونگ کمانڈر نعمان علی خان نے گرایا تھا جنہیں فوج نے بعد ازاں اعزازات سے بھی نوازا گیا۔ پاک فضائیہ کے مطابق بھارتی دراندازی کے 27 فروری کے آپریشن کا نام "آپریشن سوئفٹ ریٹارٹ" تھا۔ اب پاک فضائیہ کے کراچی میں واقع میوزیم میں ایک گیلری بنائی گئی ہے جس کا نام 'آپریشن سوئفٹ ریٹارٹ" رکھا گیا ہے۔ اس گیلری میں گرائے گئے بھارتی طیاروں کے پرزے ، ابھی نندن کا مجسمہ، اس کی وردی ، چائے کا کپ اور پاک فضائیہ کے دونوں ہیروز کی تصاویر سمیت اس آپریشن سے جڑی دیگر چیزیں رکھی گئی ہیں اور اب عام افراد بھی میوزیم میں جا کر اس گیلری کو دیکھ سکتے ہیں۔