لاہور، شہداء کی یاد میں نمائش کا اہتمام

اسلام ٹائمز۔ امامیہ اسٹوڈنٹس آرگنائزیشن پاکستان کا 48 واں سالانہ اتحاد ملت و استحکام پاکستان کنونشن جامعۃ المصطفیٰ لاہور میں جاری ہے۔ کنونشن میں بلوچستان، کے پی، گلگت بلتستان، سندھ، پنجاب اور کشمیر کے تمام ڈویژنز کی یونیورسٹیز، میڈیکل کالجز اور لوکل یونٹس کے سینکڑوں ممبران، محبین، سابقین اور علماء شریک ہیں۔ کنونشن میں شہدائے ملت جعفریہ بالخصوص شہید علامہ عارف حسین حسینی اور شہید ڈاکٹر محمد علی نقوی کی تصاویر سمیت اہم مقامات و واقعات پہ مبنی نمائش کا اہتمام کیا گیا ہے۔ جامعہ بعثت چنیوٹ کے طلاب کی جانب سے منعقد کی گئی نمائش میں جنت البقیع کے مزارات، خیمہ امامؑ، ڈاکٹر محمد علی نقوی شہید کے واقعہ شہادت کی بڑی خوبصورتی سے منظر کشی کی گئ ہے۔

اسی طرح شہید علامہ عارف حسین حسینی، امام خمینی، رہبر معظم سید علی خامنہ ای، سید حسن نصر اللہ، دفاع وطن کیلئے جان کا نذارانہ دینے اور نشان حیدر پانے والے شہداء، ملت تشیع کے شہداء اور انقلاب اسلامی کے شہداء کی تصاویر کو گلاب کے پھولوں کی پتیاں بچھا کر سرخ روشنیوں اور چراغوں کے ذریعے آراستہ کیا گیا ہے۔ کنونشن میں شریک طلبہ نمائش کے ذریعے شہداء، انقلاب اسلامی اور اہم اسلامی مقامات سے روشناس ہو رہے ہیں۔ واضح رہے کہ گذشتہ شب شہداء کی یاد میں کانفرنس کا اہتمام کیا گیا، اسکاوٹس کے دستے نے سلامی دی اور علامہ غلام شبیر بخاری، سید مقدس کاظمی سمیت اہم شخصیات نے شہداء کی سیرت پر روسنی ڈالی اور خراج عقیدت پیش کیا۔