ملتان، امریکہ کے خلاف احتجاجی علامتی دھرنا 

اسلام ٹائمز۔ مجلس وحدت مسلمین کے سربراہ علامہ راجہ ناصر عباس جعفری کی اپیل پر ملک کے دیگر شہروں کی طرح ملتان میں بھی مجلس وحدت مسلمین اور امامیہ اسٹوڈنٹس آرگنائزیشن کے زیراہتمام چوک نواں شہر پر علامتی دھرنا دیا گیا، اس موقع پر شہدا کے ایصال ثواب کے لیے قرآن خوانی بھی کی گئی، علامتی دھرنے کی قیادت مجلس وحدت مسلمین جنوبی پنجاب کے سیکرٹری جنرل علامہ اقتدارحسین نقوی، ڈپٹی سیکرٹری جنرل سلیم عباس صدیقی، علامہ قاضی نادر حسین علوی، آئی ایس او کے ڈویژنل صدر شہریار حیدر نے کی۔ دھرنے کے شرکا نے ایرانی جنرل قاسم سلیمانی کی تصاویر، پلے کارڈز اور بینرز اٹھا رکھے تھے، شرکا نے امریکہ اور اس کے حواریوں کے خلاف شدید نعرے بازی کی، سخت سردی اور بارش کے باوجود خواتین، مرد، بچے اور بوڑھوں کی بڑی تعداد موجود تھی۔ علامتی دھرنے سے خطاب کرتے ہوئے علامہ اقتدار نقوی کا کہنا تھا کہ امریکہ نے بزدلانہ کاروائی کرکے خطے کو خطرے میں ڈال دیا ہے، عالمی اداروں کی جانب سے امریکہ کی حمایت اور اور اس کاروائی پر خاموشی لمحہ فکریہ ہے، امریکہ عالم اسلام کا بدترین اورمکار دشمن ہے، اسے جب بھی موقع ملا اس نے امت مسلمہ کو ناقابل تلافی نقصان پہنچایا، امریکی دوستی کو بدترین دشمنی میں بدلتے ہوئے مسلمان حکمرانوں نے متعدد بار دیکھا ہے، عالم اسلام کو اپنی بقا اور سالمیت کے لیے امریکی حصار سے باہر نکلنا ہوگا، مقامات مقدسہ کی حفاطت کرنے والے شہید قاسم سلیمانی امت مسلمہ کے عظیم ہیرو تھے، امریکہ نے دہشت گردانہ سرگرمیوں کی راہ میں رکاوٹ دور کرنے کے لیے انہیں شہید کیا۔

آئی ایس او ملتان کے ڈویژنل صدر شہریار حیدر نے کہا کہ امریکہ کا یہ بزدلانہ فعل امریکہ کی نابودی کا پیش خیمہ ثابت ہوگا، اس وقت عالم اسلام کو متحدہونے کی ضرورت ہے، امریکی بلاک میں جو بھی مسلمان ملک شامل رہا اسے اسلامی مفادات کا دشمن سمجھا جائے گا، اب مصلحت پسندی کی بجائے جرات مندانہ فیصلوں کی گھری ہے، تاریخ بڑی بے رحم ہے مصلحت کے نام پر بزدلی دکھانے والے کو کبھی معاف نہیں کرتی۔ دیگر رہنمائوں نے خطاب کرتے ہوئے کہا کہ پاکستان کو طالم اور مظلوم کے فرق کو واضح کرنا ہوگا، مغربی امداد یا دبائو کا کوئی بھی حربہ پاکستان اور ایران کے تعلقات میں دراڑیں نہیں ڈال سکتا، پوری قوم اپنے ملک کو بیرونی دبائو سے آزاددیکھنا چاہتی ہے، ماضی میں امریکہ کے ساتھ اتحاد اور ڈو مور کے مطالبے کے نتائج دہشت گردی کی شکل میں آج تک پوری قوم بھگت رہی ہے۔ امریکہ کی رعونت اسے بہت جلد ڈبو دے گی۔ ٹرمپ کی غیردانشمندانہ اور متعصب پالیسیوں کے باعث آج پوری دنیا میں امریکی شہری شدید خوف و ہراس اور بے چینی کا شکار ہیں۔ دین اسلام ہمیں امن کا درس دیتا ہے لیکن کسی کو یہ اجازت نہیں دیتا کہ اس کے ہاتھ امت مسلمہ کے گریبانوں تک جا پہنچے۔ ایسے اسلام دشمنوں کے خلاف نتیجہ خیز جدوجہد ہی عین اسلام ہے۔

رہنمائوں نے کہا کہ آج پوری دنیا کے مسلمان امریکہ اور اس کے حواریوں کے خلاف سراپا احتجاج ہیں، ہر طرف سے بلند ہونے والی یہ صدا امریکی کی جلد نابودی کا اعلان ہے، احتجاجی ریلی میں ایم ڈبلیو ایم ملتان کے سیکرٹری جنرل مرزا وجاہت علی، مولانا عمران ظفر، مولانا غلام جعفر انصاری، سید طالب حسین پرواز، زوار حسین بسمل، عاطف حسین، سید منظر عباس زیدی، جواد مصطفی، فخر نسیم، ڈاکٹر غضنفر ملک، الطاف حسین، حاجی اظہر عباس، سمیت شہر کی دیگر تنظیموں کے قائدیں نے بھی شرکت اور خطاب کیا، آخر میں امریکی پرچم اور صدر ٹرمپ کا پتلا بھی نذر آتش کیا گیا۔