علامہ اقتدار نقوی کا دورہ جنوبی پنجاب

اسلام ٹائمز۔ ایم ڈبلیو ایم جنوبی پنجاب کے سیکرٹری جنرل علامہ اقتدار حسین نقوی نے جنوبی پنجاب کے دورے کے پہلے مرحلے میں میانوالی میں ایتام پروجیکٹ میں سات لاکھ روپے کے وظائف تقسیم کیے، امدادی سرگرمیوں کا جائزہ لیا اور اسلامی نظریاتی کونسل کے ممبر علامہ سید افتخار حسین نقوی سے ملاقات کے علاوہ ضلعی کابینہ سے ملاقات بھی کی. دوسرے مرحلے میں علامہ اقتدار حسین نقوی نے ضلع لیہ کا ایک روزہ دورہ کیا، دورے کے دوران المجلس ڈیزاسٹر منیجمنٹ سیل کے زیراہتمام جاری فلاحی سرگرمیوں کا جائزہ لیا، اس موقع پر صوبائی کوارڈینیٹر المجلس ڈیزاسٹر منیجمنٹ سیل جنوبی پنجاب سید زعیم حیدر زیدی بھی ان کے ہمراہ تھے۔ علامہ اقتدار حسین نقوی ضلع لیہ کی کابینہ کے اجلاس میں خصوصی شرکت کی اور ملک بھر سمیت جنوبی پنجاب میں ہونے والی فعالیت پر گفتگو کی۔ اس موقع پر ضلعی سیکرٹری جنرل صفدر حسین خان مورانی، مولانا ساجد اسدی، صفدر خان، جمیل حسین خان، ساجد خان اور دیگر رہنما موجود تھے۔ بعدازاں علامہ اقتدار حسین نقوی نے سابق ضلعی سیکرٹری جنرل ڈیرہ غازیخان کی زیرسرپرستی میں چلنے والے الحجت سکول کا دورہ بھی کیا اور اس کاوش کو سراہا۔

تیسرے مرحلے میں علامہ اقتدار حسین نقوی نے ڈیرہ غازیخان کا دورہ کیا اور ضلع میں موجود تین قرنطینہ سنٹرز میں زائرین کی تعداد، صورتحال اور اب تک کی ہونے والی کارکردگی کا جائزہ لیا۔ اس موقع پر صوبائی کوارڈینیٹر المجلس ڈیزاسٹر منیجمنٹ سیل جنوبی پنجاب سید زعیم حیدر زیدی، ضلعی سیکرٹری جنرل سید انعام حیدر زیدی، ضلعی کوارڈینیٹر المجلس ڈیزاسٹر منیجمنٹ سیل رحمت رضا کھوسہ، زوار جہانزیب اور دیگر موجود تھے۔ سید انعام حیدر زیدی نے صوبائی سیکرٹری جنرل کو بتایا کہ ضلع ڈیرہ غازیخان مین واقع تینوں قرنطینہ سنٹرز سے زائرین اپنے اپنے گھروں کو روانہ ہوچکے ہیں، جس دورانیے میں زائرین نے یہاں قیام کیا، المجلس ڈیزاسٹر منیجمنٹ سیل کی جانب سے ضلعی انتظامیہ کے ساتھ مکمل تعاون کرتے ہوئے زائرین کی اشیائے ضروریہ پہنچانے میں اپنا کردار ادا کیا۔

چوتھے مرحلے میں علامہ اقتدار حسین نقوی نے رحیم یارخان کا دورہ کیا، المجلس ڈیزاسٹر منیجمنٹ سیل جنوبی پنجاب کے صوبائی کوارڈینیٹر سید زعیم حیدر زیدی بھی ان کے ہمراہ تھے۔ علامہ اقتدار نقوی نے دورہ رحیم یارخان کے دوران ضلع بھر میں جاری کرونا متاثرین کے لیے امدادی کارروائیوں کا جائزہ لیا، اس موقع پر ضلعی سیکرٹری جنرل سید حسنین نقوی، مولانا سید مجاہد حسین نقوی اور دیگر کابینہ کے اراکین بھی موجود تھے، ضلعی سیکرٹری جنرل نے علامہ اقتدار حسین نقوی کو لاک ڈاون کے دوران متاثرین کے لیے جاری امدادی سرگرمیوں پر بریفنگ دی۔ پانچویں مرحلے میں علامہ اقتدار حسین نقوی نے ضلع راجن پور کا دورہ کیا اور کرونا جیسے وبائی مرض کے پیش نظر لاک ڈاون سے متاثرہ افراد کے لیے جاری امدادی سرگرمیوں کا جائزہ لیا، اس موقع پر صوبائی کوارڈینیٹر المجلس ڈیزاسٹر منیجمنٹ سیل سید زعیم حیدر زیدی بھی ہمراہ تھے۔ علامہ اقتدار نقوی کو بتایا گیا کہ المجلس ڈیزاسٹر منیجمنٹ سیل کی جانب سے راجن پور شہر، جام پور، روجھان اور کچے کے علاقوں میں لاک ڈاون سے متاثرہ غریب، نادار اور مستحق افراد میں راشن تقسیم کیا گیا ہے اور اس کے ساتھ ساتھ روزانہ کی بنیاد پر دور دراز علاقوں میں افطاری کا اہتمام بھی کیا جا رہا ہے۔