اسلام ٹائمز - شمالی وزیرستان، جائے وقوعہ سانحہ میر علی

دہشتگردوں کی فائرنگ سے نیسپاک کے چار اہلکار شہید ہوگئے ہیں، شہداء میں ڈیرہ اسماعیل خان سے تعلق رکھنے والے امامبارگاہ تھلہ فضل شاہ کے متولی سید ظفر عباس شاہ بھی شامل ہیں۔ چاروں اہلکار ادارے کی گاڑی میں ہی سوار تھے اور پیشہ وارانہ خدمات کے سلسلے میں شمالی وزیرستان میں موجود تھے۔

اسلام ٹائمز۔ شمالی وزیرستان میں دہشتگردوں کی فائرنگ سے نیسپاک کے چار اہلکار شہید ہوگئے ہیں، شہداء میں ڈیرہ اسماعیل خان سے تعلق رکھنے والے امامبارگاہ تھلہ فضل شاہ کے متولی سید ظفر عباس شاہ بھی شامل ہیں۔ چاروں اہلکار ادارے کی گاڑی میں ہی سوار تھے اور پیشہ وارانہ خدمات کے سلسلے میں شمالی وزیرستان میں موجود تھے۔ سانحہ شمالی وزیرستان کی تحصیل میر علی میں پیش آیا۔ چاروں افراد مختلف شہروں سے تعلق تھے اور ایف ڈبلیو او کے شعبہ انجنیئرنگ سروس میں خدمات سرانجام دیتے تھے۔ ڈسٹرکٹ پولیس آفیسر شمالی وزیرستان شفیع اللہ گنڈہ پور کی جانب سے فراہم کردہ تفصیلات کے مطابق چاروں افراد میں سے ایک شہید سید ظفر عباس شاہ کا تعلق ڈیرہ اسماعیل خان سے ہے اور وہ امامبارگاہ تھلہ فضل شاہ کے متولی ہیں۔

باقی مقتولین کا تعلق میر علی، ایبٹ آباد اور گوجرانولہ سے ہے۔ ڈی پی او شفیع اللہ گنڈہ پور کے مطابق واقعہ کی تحقیقات شروع کر دی گئی ہیں اور حملہ آوروں کی تلاش و گرفتاری کے لئے سرچ آپریشن بھی شروع کر دیا گیا ہے۔ مقتولین کی لاشیں میر علی ہسپتال میں پوسٹ مارٹم کی غرض سے منتقل کر دی گئی ہیں جبکہ پولیس کی مختلف ٹیمیں وقوعہ کا مختلف پہلوؤں سے جائزہ لیکر باریک بینی سے تحقیقات کر رہی ہیں۔