اسلام ٹائمز - کراچی، عظیم الشان جشن مولود کعبہ (ع)

نشتر پارک میں منعقدہ جشن سے خطاب میں رہنماؤں نے کہا کہ حضرت علی علیہ السلام نے وہ اصول دیئے کہ جس سے معاشرے میں کرپشن ہوسکتی ہے نہ کسی کا حق پامال ہوسکتا ہے بلکہ علی علیہ اسلام نے مالک اشتر کو لکھے گئے خط میں اپنے ملک کے حدود اور سرحدوں کی حفاظت کے اصول بھی واضح کئے۔

اسلام ٹائمز۔ جعفریہ الائنس پاکستان کی جانب سے حضرت امام علی علیہ اسلام کے یوم ولادت پر مرکزی جشن کا اہتمام نشتر پارک کراچی میں منعقد کیا گیا، جس میں مہمان خصوصی صوبائی وزیر ناصر حسین شاہ، مشیر وزیراعلیٰ سندھ وقار مہدی، علامہ رضی جعفر نقوی، علامہ اصغر درس و دیگر مذہبی و سیاسی رہنماؤں نے شرکت کی اور خطاب کیا۔ اس موقع پر جعفریہ الائنس پاکستان کے صدر علامہ سید رضی جعفر نقوی کا خطاب کرتے ہوئے کہنا تھا کہ اگر حکمران معاشرے میں عدل و انصاف کا قیام چاہتے ہیں تو حضرت علی علیہ السلام کے دور حکومت سے درس لیں کہ جہاں حضرت علی علیہ اسلام نے اپنے دور حکومت میں اپوزیشن کے افراد کا ہی احتساب نہیں کیا بلکہ اپنے چاہنے والوں کے بھی ہاتھ کاٹ کر عدل و انصاف کی ایک ایسی روشن مثال قائم کی، جو قیامت تک حکمرانوں کے لئے رہنمائی ہے۔ ان کا کہنا تھا کہ حضرت علی علیہ اسلام نے مالک اشتر کو جو حکومت چلانے کے لئے اصول دیئے وہ اصول آج اقوام متحدہ کے چارٹر کا حصہ ہیں جس کے اصولوں کی بناء پر آج کے زمانے کا اقوام متحدہ کا سیکرٹری جنرل یہ کہنے پر مجبور ہے کہ اگر انسان علی علیہ اسلام کے اس خط پر عمل کرے تو پوری دنیا میں انصاف اور عدل قائم ہوسکتا ہے، حضرت علی نے وہ اصول دیئے کہ جس سے معاشرے میں کرپشن ہوسکتی ہے نہ کسی کا حق پامال ہوسکتا ہے بلکہ علی علیہ اسلام نے اس خط میں اپنے ملک کے حدود اور سرحدوں کی حفاظت کے اصول بھی واضح کئے۔ جشن کے اختتام پر جعفریہ الائنس کی جانب سے 100پونڈ کا کیک کاٹا گیا اور آتش بازی کا بھی اہتمام کیا گیا۔