وزیر اعظم کا متوقع دورہ، سکردو میں تیاریاں

اسلام ٹائمز۔ وزیر اعظم عمران خان کے دورے اور جلسے کی تیاریوں کو حتمی شکل دیدی گئی۔ میونسپل اسٹیڈیم میں بہت بڑا سٹیج سجانے کا عمل جاری ہے۔ وزیر اعظم عمران خان کو وزیر اعلی خالد خورشید چارٹر آف ڈیمانڈ پیش کریں گے۔ وزیر اعلی اور صوبائی وزرا منگل کے روز سکردو پہنچیں گے۔ پیر کے روز گورنر راجہ جلال حسین مقپون، سینئر وزیر راجہ ذکریا خان، وزیر زراعت کاظم میثم، وزیر تعمیرات عامہ وزیر سلیم، وزیر کھیل و ثقافت راجہ ناصر علی خان، وزیر اعلی کے کوارڈینٹر تقی آخونزادہ، کمشنر بلتستان شجاع عالم اور پی ٹی آئی بلتستان کے رہنماوں نے میونسپل اسٹیڈیم میں جلسہ گاہ کا دورہ کیا اور انتظامات کا جائزہ لیا۔ گورنر راجہ جلال حسین مقپون نے وزیر اعظم عمران خان کے دورے کے انتظامات شاندار طریقے سے کرنے کے احکامات جاری کئے اور ضلعی انتظامیہ کو ہدایات جاری کیں کہ انتظامات میں کسی قسم کی کوئی کمی بیشی نہیں رہنی چاہیئے۔