کوئٹہ، خلجی قبیلے کے سربراہ کی قومی اصلاحی کمیٹی سے ملاقات

اسلام ٹائمز۔ خلجی قبیلے کے سربراہ یوسف خان خلجی و دیگر قبائلی شخصیات نے آج قومی اصلاحی کمیٹی کے کنوینر علامہ علی حسنین حسینی، کمیٹی کے اراکین علامہ محمد کاظم بہجتی، پروفیسر عابدہ حیدری، ارباب لیاقت علی ہزارہ، مبارک علی اور حاجی رمضان سے ملاقات کی۔ جس میں خلجی قبیلے کے سربراہ نے ویڈیو اسکینڈل کیس میں ملوث ملزم ہدایت خلجی سے سخت نفرت اور لاتعلقی کا اظہار کیا۔ خلجی قبائل کے سربراہ نے پروفیسر عابدہ حیدری کو روایتی شال بھی پہنائی۔ جو قبائلی معاشرے میں عزت اور غیرت کی علامت ہوتی ہے۔

قومی اصلاحی کمیٹی کے اراکین نے ہدایت خلجی کی ظالمانہ اور سفاک حرکات کی شدید مذمت کرتے ہوئے کہا کہ ہدایت خلجی نے پوری انسانیت کی تذلیل کی ہے۔ انکا کہنا تھا کہ ہدایت جیسے درندہ صفت شخص اور اسکے گروہ نے بلوچستان کے قبائلی نظام اور تمام اقوام کے اقدار کی بدترین توہین کی ہے۔ اگر اس سفاک درندے کو سزا نہیں ہوئی، تو بلوچستان کا مستقبل بربادی سے دوچار ہوجائے گا۔

خلجی قبائل کے سربراہ یوسف خان خلجی نے اس موقع پر ہدایت خلجی کی سخت ترین الفاظ میں مذمت کرتے ہوئے کہا کہ ہم نے اس شخص کو اپنے قبیلہ سے نکال دیا ہے۔ ایسے افراد انسانیت کے نام پر کسی داغ سے کم نہیں۔ انہوں نے کہا کہ ہم نے برسوں برادر اقوام کے ساتھ خوش اسلوبی اور دیانتداری سے زندگی بسر کی ہے اور کبھی کسی کو نقصان نہیں پہنچایا۔ انہوں نے کہا کہ خلجی قبیلہ ایک معتبر قبیلہ ہے، جس میں ہدایت خلجی جیسے سفاک کیلئے کوئی جگہ موجود نہیں ہے۔ انہوں نے کہا کہ ہدایت جیسے درندے کو گرفتار کرنے کے بجائے اسے سرعام سزا دے دینا چاہئے تھا۔ ملاقات میں یہ عزم کیا گیا کہ تمام اقوام کے افراد یکجاں ہوکر ہدایت خلجی کو قانونی سزا دلانے کیلئے کوششیں کریںگی۔