قم المقدسہ، میڈیا نمائندگان کی امام جمعہ اسکردو سے ملاقات

اسلام ٹائمز۔ امام جمعہ و الجماعت سکردو بلتستان علامہ شیخ محمد حسن جعفری سے قم میں موجود صحافیوں نے ملاقات کی ہے۔ اس ملاقات میں پاکستانی دینی مدارس کے ترجمان رسالہ وفاق ٹائمز کے چیف ایڈیٹر نے اپنی سرگرمیوں کے بارے میں علامہ شیخ محمد حسن جعفری کو بریفنگ دی۔ اس موقع پر علامہ شیخ محمد حسن جعفری نے میڈیا کی اہمیت اور ضرورت کی طرف اشارہ کرتے ہوئے کہا کہ اسلام نے پیغام پہنچانے پر بہت تاکید کی ہے اور میڈیا کی اہمیت کا اس بات سے اندازہ ہوتا ہے کہ غدیر خم میں بھی پیغمبر اسلام صلی اللہ علیہ وآلہ وسلم نے ولایت امیرالمومنین علیہ السلام کا اعلان کرنے کے بعد ولایت کے اس اہم پیغام کو دنیا کے گوشہ و کنار تک پہنچانے کی تاکید فرمائی، لہذا ہمیں بھی میڈیا کی اہمیت کو سمجھتے ہوئے دین مبین اسلام کی تعلیمات کو دنیا تک پہنچانے میں اہم کردار ادا کرنے کی ضرورت ہے۔

انہوں نے مزید کہا کہ آج دنیا پہلے کی نسبت سچائی کی زیادہ متلاشی ہے، لہذا ہمیں چاہیئے اپنی شناخت برقرار رکھتے ہوئے اسلام کی اصلی اور بنیادی تعلیمات سے دنیا کو آگاہ کریں۔ انہوں نے وفاق ٹائمز کی سرگرمیوں کو سراہتے ہوئے کہا کہ ہمیں دنیا بھر کی خبریں اس سائٹ کے ذریعے موصول ہوتی رہتی ہیں اور حالیہ چند برسوں میں میڈیا کی حیران کن ترقی نے دنیا کو ایک ’’گلوبل ویلیج‘‘بنا کر رکھ دیا ہے اور یہ کہا جاسکتا ہے کہ یہ دور میڈیا وار کا دور ہے، میڈیا کا معاشرے میں اہم کردار ہے اور میڈیا کی حیران کن ترقی نے دنیا بھر کی طرح گلگت بلتستان کو بھی شدید متأثر کیا ہے، لہذا ہمیں میڈیا کا صحیح استعمال کرتے ہوئے دشمن کی سازشوں کو ناکام بنانے کی ضرورت ہے۔ ملاقات میں وفاق ٹائمز کے چیف ایڈیٹر محمد ابراہیم صابری، حوزہ نیوز ایجنسی اردو کے ایڈیٹر سید محمود رضوی، معروف صحافی ضامن علی، جعفر سبحانی اور اصغر عباس شامل تھے۔