کراچی میں بارشوں سے نظام زندگی درہم برہم

کراچی:اسلام ٹائمز۔کراچی میں حالیہ بارشوں کے دوران سڑکوں پر متعدد مقامات پر کئی فٹ پانی جمع ہونے اور گھنٹوں ٹریفک جام رہنے کی وجہ شہر کا نظام زندگی درہم برہم ہو گیا ہے، اس سلسلے میں محکمہ ورکس اینڈ سروسز کا کہنا ہے کہ شہر بھر کے برساتی نالے اور لائنیں بند ہوگئی تھیں۔ واضح رہے کہ برساتی نالوں کی صفائی کی ذمہ داری محکمہ میونسپل سروسز اور سڑکوں کے ڈرین سسٹم کو صحیح حالت میں رکھنا محکمہ ورکس اینڈ سروسز کی ذمہ داری ہے۔ ذرائع سے معلوم ہوا ہے کہ ایک ماہ قبل بارشوں کی پیشنگوئی کے باوجود محکمہ ورکس اینڈ سروسز میں نہ ایمرجنسی ڈیکلئر کی گئی اور نہ ہی مشینری یا انجینئرز اور عملہ کہیں سڑکوں پر نظر آیا، جس کا خمیازہ شہریوں کو کئی فٹ پانی میں گھنٹوں پھنسنے کی شکل میں بار بار بھگتنا پڑ رہا ہے۔