عمران خان سے پہلے کسی نے 70 سال میں کبھی اسطرح کا ایجنڈا نہیں دیا، ڈاکٹر سلمان شاہ

ڈاکٹر سلمان شاہ: قوم سے پہلے خطاب سے یہ امر بخوبی واضح ہوگیا تھا کہ وزیر اعظم کو ملک کو درپیش چیلنجز اور پاکستانیوں کے مسائل کا بخوبی اندازہ ہے۔ انہوں نے نہ صرف مسائل کا مفصل ذکر کیا, بلکہ ان کے حل کے لیے حکمت عملی پر بھی قوم کو اعتماد میں لیا ہے۔ ملکی معیشت کی زبوں حالی اور قوم پر 28 ہزار ارب روپے کے قرضوں کا تقاضا یہی ہے کہ کفایت شعاری اختیار کرتے ہوئے قرضوں کے چنگل سے نکلنے کی سعی کی جائے۔ عمران خان کے وزیر اعظم ہائوس میں رہنے سے انکار کو علامتی کہا جا سکتا ہے، مگر ان کا 524 ملازمین اور 80 کے لگ بھگ لگژری گاڑیوں کو نیلام کرنے کا فیصلہ حکومتی مشینری کے لیے واضح پیغام ہے کہ اگر وزیراعظم پر آسائش زندگی تیاگ سکتے ہیں، تو ان کے وزراء اور افسر شاہی کو بھی کفایت شعاری اپنانا ہو گی۔ جہاں تک وزراء کی فضول خرچی کا معاملہ ہے تو وزیر اعظم پہلے ہی غیر ضروری بیرون ملک دوروں کو محدود کرنے اور یورپ امریکہ میں سرکاری خرچ پر علاج کروانے پر پابندی لگا چکے ہیں۔ حکومت اس حوالے سے بھی حقائق عوام کے سامنے رکھے اور کابینہ اور ارکان اسمبلی کے ساتھ بیورو کریسی کی شاہ خرچیوں پر بھی قد غن لگائی جائے تاکہ حکمرانوں کی کفایت شعاری کو عوام کے لیے ماڈل کے طور پیش کیا جا سکے۔

پاکستان میں ابتدائی چند برسوں کے بعد سے قیادت کا بحران رہا، مگر 1970ء کی دہائی کے بعد اب پہلا موقع آیا ہے، جب سادگی کی بات ہو رہی ہے اور بلا تفریق احتساب کا چرچا ہے۔ دراصل معیشت میں ترقی لازم ہے، سماجی معاشرتی ترقی بھی مستحکم معیشت کے بغیر بے معنی ہے، کیونکہ تہذیب، امن، سکون معیشت سے مشروط ہے۔ نواز شریف کے بیانیہ کے ازالہ کے لئے جن جن حلقوں سے تحریک انصاف ہاری ہے، وہاں سرکاری سکولوں کا جال بچھا دیں، گھریلو دستکاری بنگلہ دیش کی طرز پر شروع کر ادیں اور غریب عوام کو گھروں کی دہلیز پر روزگار فراہم کر دیں، تو اگلے قومی انتخابات میں 90 فیصد نتائج تحریک انصاف کے دامن میں آجائیں گے۔ اس کے لئے اربوں روپے کی تشہیر کرانے کی ضرورت پیش نہیں آئے گی، نہ ہی حکومت میڈیا ہائوسز کی محتاج ہوگی، اسی طرح بڑے بڑے عظیم منصوبوں کے ساتھ ساتھ صدر ایوب خان کے منصوبے کے تحت سمال انڈسٹریز کے منصوبے شروع کرا دیں اور سعودی عرب اور مشرق وسطیٰ کے امیر ترین ریاستوں سے قرضے اور امداد کے حصول کی بجائے، ان ملکوں میںپاکستانیوں کے لئے روزگار کے مواقع کھلوا دیں۔ قوم کو عمران خان سے بہت سی توقعات ہیں، لہٰذااربوں ڈالر پر مشتمل دولت کو جو پاکستان سے منی لانڈرنگ کے ذریعے بیرون ملک پوشیدہ رکھی گئی ہے، واپس لانا ضروری ہے۔

اسلام ٹائمز: وزارتوں کی موجودگی میں ٹاسک فورسز کا تجربہ شہباز شریف بھی کر چکے ہیں، کیا یہ کارآمد ثابت ہو گا؟
ڈاکٹر سلمان شاہ: پنجاب میں اپوزیشن بہت مضبوط ہے، لہٰذافلاحی کاموں کی طرف انقلابی قدم اٹھانے ہوں گے۔ شہباز شریف کی طرز کو تبدیل کرنا ہوگا، جن کا وطیرہ تھا کہ ہر واردات کے بعد رپورٹ طلب کرتے تھے، مگران کے دس سالہ دور حکومت میں ایسی کسی رپورٹ پر عمل در آمد نہ ہوا۔ یہی طریقہ کار پنجاب کی نگران حکومت نے اختیار کیا ہوا تھا، اب پنجاب کی نئی حکومت کو ایسے فریب زدہ نوٹسز لینے کے لالی پاپ دینے کی بجائے، گھروں کی دہلیز پر انصاف فراہم کرنا ہوگا اور متعلقہ تھانے کے ایس ایچ او کو مظلوم گھرانے کے سامنے کھڑا کرنا ہوگا، جس طرح عمران خان نے ہر تھانے کے ایس ایچ او کے انتخاب کے ذریعے تقرر کے عزم کا اظہار کیا تھا، جسے شفقت محمود کی مخالفت کی وجہ سے انہیں ترک کرنا پڑا۔ عمران خان تکنیکی بنیادوں پر جو ٹاسک فورس بنانے کا عزم رکھتے ہیں، اس میں ایسے ماہرین کو شامل کیا جائے، جو ریاست کے مفاد میں اپنی صلاحیتوں کو بروئے کار لائیں۔ عمران خان کی کابینہ کے ارکان کو مختلف ٹاک شوز میں اپنا نقطۂ نظر پیش کرنے کے لئے بھیجنے کی بجائے، متعلقہ وزارت کا فوکل پرسن بھیجا جائے، وزراء کو ٹاک شوز اور میڈیا میں اپنی ہوا باندھنے کی بجائے عملی کارکردگی پر توجہ دینا ہو گی۔ اگر سیاسی عزم ہو تو کوئی کام ناممکن نہیں، تعلیم ،صحت وغیرہ جیسے شعبے تو ٹاسک فورس سے قابو میں آ سکتے ہیں۔

عمران خان کو چاہیے کہ وہ اپنا وقت ضائع نہ کریں اور ملکی اداروں کو درست کریں۔ اسٹیل ملز بند ہوچکی، لیکن کسی نے پروا نہیں کی۔ عمران خان جب روزگار کے مواقع پیدا کرنے کی بات کر رہے ہیں تو پہلے انہیں بند اداروں کو چلانا ہو گا۔ عوام طویل عرصے سے تعلیم،صحت،روزگار اور بلدیاتی مسائل سے دوچار ہیں، ہر حکومت وعدے کرتی رہی لیکن عوام تک صرف نعرے پہنچتے رہے، کام کسی اور کے ہوتے رہے۔ اب جب کہ طویل عرصے بعد ایک بار پھر عوامی مسائل کی بات نئے انداز سے کی جا رہی ہے تو امید ہے کہ مسائل حل ہونا شروع ہو جائیں گے۔ وزیر اعظم عمران خان کی نیک نیتی پر شبہ کرنے کے بجائے اچھے کی امید رکھی جائے۔ لگتا ہے اس بار کچھ نیا ہو جائے گا اور اسٹیٹس کو ٹوٹ جائے گا۔ قوم کو ساری توقعات اب عمران خان سے ہی ہیں، لیکن ان کی ٹیم میں وہ جان نہیں ہے۔ اب یہ کپتان کا کام ہے کہ وہ ان سے کیسے کام لیتا ہے اور ملک کو کیسے بحران سے نکالتا ہے، عمران خان کا ماضی تو ایسا ہی ہے کہ جس کام کا ارادہ کیا اُسے پورا کیا، اب دیکھنا ہے کہ تعلیم، روزگار، مکان، احتساب کے نعرے کتنے کامیاب ہوتے ہیں۔

اسلام ٹائمز: پاکستان کے سیاسی اور معاشی استقلال اور ترقی کیلئے آپ نئی حکومت کو کیا تجاویز دینگے؟
ڈاکٹر سلمان شاہ: معاشی بحران سے نمٹنے اور سخت معاشی انتظام کے لیے قلیل مدتی اقدامات کے ساتھ آئی ایم ایف یا کسی دیگر ذرائع کا انتخاب کرتے ہوئے منظم معاشی پروگرام اختیار کرنے کی ضرورت ہے۔ وزارت خزانہ اور ایف بی آر میں گورننس کو مضبوط بناتے ہوئے اصلاحات پر عمل درآمد کے ذریعے صنعت کو بحال اور موجودہ بحرانی کیفیت کا مقابلہ کیا جا سکتا ہے، گزشتہ 28سال میں یہ 13واں موقع ہے جب پاکستان ایک سخت ڈکٹیشن والے قرضوں کے پروگرام کی جانب بڑھ رہا ہے۔ اس تصور کے پیچھے تصور قوم کو متحد کرنے کی ضرورت ہے تاکہ روزگار کے مواقع بڑھانے کے ساتھ ویلیو ایڈڈ ایکسپورٹ میں اضافہ کیا جاسکے، درآمدات کو محدود کرنے کے لیے متبادل مہیا ہوسکے اور ٹیکس کا دائرہ وسیع کیا جاسکے۔ نو منتخب حکومت کے لیے ملک میں مثبت تاثرات اور ساکھ کے ابتدائی دورانیے کو بنیادی اصلاحات کے لیے استعمال کیا جائے۔ حکومتی پالیسیوں پر قومی سطح پر اتفاق رائے قائم کرنے کے لیے کونسل آف بزنس لیڈرز کا قیام بھی ضروری ہے۔ اسی طرح تقسیم کار کمپنیوں کی نجکاری، ٹرانسمیشن کے نقصانات پر قابو پانے سمیت قابل تجدید اور درآمدات پر انحصار کم کرنے کے لیے مقامی وسائل اختیار کرنے کی بھی اشد ضرورت ہے۔ اس کے علاوہ ٹیکس پالیسی کی تشکیل کے عمل کو ٹیکس وصولیوں تک محدود رکھنے کے بجائے اسے سرمایہ کاروں کی ترغیب کے لیے پرکشش بنانے اور ٹیکس نیٹ بڑھانے کے لیے ایف بی آر میں افرادی قوت کی بہتری اور ٹیکنالوجی کے موثر استعمال کی ضرورت ہے۔ ٹیکسوں کے نظام کو آسان بنانے اور ٹیکس گزاروں کی سہولت کے لیے تمام وفاقی، صوبائی اور لوکل گورنمنٹ ٹیکسز کو نیشنل ٹیکس اتھارٹی کے ماتحت کیا جانا چاہیے۔ برآمد کنندگان کو ٹیکس ریفنڈز کی ادائیگی کے مسئلے کے حل کے لیے برآمدات کو زیرو ریٹ کرنے سے بھی نتائج آ سکتے ہیں۔

اسلام ٹائمز: سی ایم پنجاب کے متعلق کہا جا رہا ہے کہ تجربے اور مہارت کے فقدان کی وجہ سے وہ صوبہ کیسے چلائیں گے؟
ڈاکٹر سلمان شاہ: نہ جانے کیوں جب بھی نظام کی اصلاح کی بات ہوتی ہے تو نظر صرف سفید ریش حضرات کی طرف جاتی ہے؟ نہ جانے ہم ایسے مواقع پر صرف اُن کی طرف ہی کیوں دیکھتے ہیں کہ جو اس ناقص اور بوسیدہ نظام میں، جو تمام خرابی کی جڑ ہے، 40، 40 سال کامیابی کے جھنڈے گاڑ چکے ہوتے ہیں؟ نہ جانے کیوں جب سروسز کی اصلاحات کا ارادہ باندھتے ہیں تو ہمیں صرف سی ایس پی، ڈی ایم جی اور اب پاکستان ایڈمنسٹریٹو سروس ہی کے ستون ہی نظر آتے ہیں؟ ہم پولیس کی اصلاح کی ٹھانتے ہیں، پولیس سروس آف پاکستان کے انہی افسران پرکیوں نظر پڑتی ہے، جو مختلف ادوار میں حکومتوں کی آنکھ کا تارہ رہ چکے ہوتے ہیں؟ ہم سمجھتے ہیں کہ سروسز میں ماتحت طبقے مثلاً صوبائی اور ضلعی سروسز سے منسلک ملازمین کو بھی مشاورت کے عمل میں شامل کرنا چاہیے اور جو ملازمین تھانے کی سطح پر کام کرتے ہیں، ان کا رابطہ چونکہ شہریوں سے زیادہ ہوتا ہے، اس لیے ان کی طرف سے بھی مفید اور قابل عمل مشورے آ سکتے ہیں۔ خیبر پختونخوا اور پنجاب میں زمین آسمان کا فرق ہے۔

خیبر پختونخوا کی پولیس اور دیگر بہت سے شعبے کبھی پنجاب یا دیگر شعبوں جیسے نہ تھے۔ پنجاب میں انحطاط اور خرابی اپنی مثال آپ ہے۔ اس کا یہ مطلب ہرگز نہیں کہ پنجاب میں اصلاح ممکن نہیں۔ مطلب صرف یہ ہے کہ پنجاب کے مسائل کی سنگین نوعیت کا صحیح ادراک فرمائیں۔ یہ بھی احساس کریں کہ پسماندہ علاقے سے ہونا اور خود پسماندہ ہونے میں فرق ہے۔ جناب وزیراعظم کا تعلق میانوالی کے علاقے سے ہے، لیکن ان کا خاندان کسی طرح پسماندگی کا شکار نہیں۔ تاریخی لحاظ سے بھار تھی بزدار قبیلہ کی بڑی آبادی رہی ہے اور یقینا ایک نہایت پسماندہ علاقہ ہے، لیکن ہمارے کئی بڑے بڑے رؤسا اور سردار بھارتھی سے بھی زیادہ پسماندہ علاقوں سے تعلق رکھتے ہیں، مگر ان علاقوں کی پسماندگی ان معززین کی پسماندگی نہیں رہی، بلکہ غور کریں تو ان علاقوں اور وہاں کے لوگوں کی پسماندگی ہی ہمیشہ ان معززین کے اثرورسوخ کا موجب رہی ہے۔ پسماندہ علاقے سے ہونا کوئی کلنک کا ٹیکہ نہیں، بہترین افراد کو بہترین کردار کے لیے چنا جائے گا تو مشاورت بھی بہترین ہو گی اور کارکردگی کے نتائج بھی بہترین برآمد ہوں گے۔