اسلام ٹائمز - مکتب شہید سلیمانی کو اپنا کر ہی امت مسلمہ اپنا راستہ تلاش کرسکتی ہے، علامہ ارشاد علی

جنرل قاسم سلیمانی کی برسی کے حوالے سے خصوصی انٹرویو

مکتب شہید سلیمانی کو اپنا کر ہی امت مسلمہ اپنا راستہ تلاش کرسکتی ہے، علامہ ارشاد علی

شہید سلیمانی اپنی شہادت سے آزادی قدس کی تحریک کو مزید مضبوط کرگئے

مجلس وحدت مسلمین خیبر پختونخوا کے ڈپٹی سیکرٹری جنرل کا ’’اسلام ٹائمز‘‘ کیساتھ خصوصی انٹرویو کے دوران کہنا تھا کہ اقوام متحدہ تو امریکہ کے زیر اثر ہے، ہونا تو یہ چاہیئے تھا کہ اقوام متحدہ عالمی قوانین کی اس خلاف ورزی پر ڈونلڈ ٹرمپ اور دیگر امریکی ذمہ داران کیخلاف کارروائی کرتا، پوچھا جاتا کہ آپ نے ایک ملک کا جرنیل سرعام کیسے مار دیا۔؟ اگر کوئی امریکہ کا جرنیل مار دیتا تو کیا دنیا کا یہ ردعمل ہوتا۔؟ افسوس کیساتھ کہنا پڑتا ہے کہ یہاں دہرا معیار ہے۔ کم از کم مسلم ممالک کو امریکہ کی اس بدمعاشی پر ایکشن لینا چاہیئے تھا۔ اگر پاکستان کی بات کروں تو اس حوالے سے ہماری حکومت کا موقف بھی بہت کمزور تھا۔

علامہ ارشاد علی کا بنیادی تعلق صوبہ خیبر پختونخوا کے ضلع ہنگو سے ہے، انکا شمار مجلس وحدت مسلمین کے دیرینہ مسئولین میں ہوتا ہے، علامہ صاحب اسوقت ایم ڈبلیو ایم خیبر پختونخوا کے ڈپٹی سیکرٹری جنرل کی حیثیت سے ملی و قومی ذمہ داری نبھا رہے ہیں، جبکہ اس سے قبل ایم ڈبلیو ایم ضلع ہنگو کے سیکرٹری جنرل اور صوبائی سیکرٹری تربیت کی مسئولیت پر بھی فائز رہ چکے ہیں۔ ’’اسلام ٹائمز‘‘ نے عالم اسلام کے عظیم سپاہ سالار اور مدافع مقدسات حاج سردار شہید قاسم سلیمانی، شہید ابو مہدی المہندس اور انکے رفقاء کی پہلی برسی کی آمد کے سلسلے میں ملک کی اہم مذہبی، سیاسی اور صاحب رائے شخصیات کے انٹرویوز کا سلسلہ شروع کیا ہے، تاکہ عالم اسلام کے ان عظیم شہداء کے کارناموں کو امت مسلمہ کی بیداری کا وسیلہ بنایا جائے۔ اسی سلسلہ میں علامہ ارشاد علی صاحب کیساتھ ایک خصوصی انٹرویو کا اہتمام کیا گیا، جو قارئین کے پیش خدمت ہے۔ (ادارہ)

اسلام ٹائمز: عرب ممالک نے اسرائیل کو تسلیم کرکے امت مسلمہ اور خاص طور پر فلسطین کاز کو کس حد تک نقصان پہنچایا ہے۔؟
علامہ ارشاد علی: بسم اللہ الرحمٰن الرحیم، سب سے پہلے تو آپ کا شکریہ کہ اس اہم موضوع پر بندہ ناچیز کو گزارشات کا موقع فراہم کیا۔ اس حوالے سے تو میں یہ کہوں گا کہ ان عرب ممالک نے مسلمانوں کی غیرت کا جنازہ نکال دیا ہے، اب عالم اسلام اور خاص طور پر مسلم ممالک کے عوام کو یہ سمجھ لینا چاہیئے کہ کون امت مسلمہ کا ہمدرد ہے اور کون غدار۔ ان ممالک کے اسرائیل کیساتھ تعلقات تو بہت پرانے ہیں لیکن منظر عام پر اب آئے ہیں۔ یہ سلسلہ ابھی رکا نہیں ہے، مجھے ان لوگوں کی سوچ پر حیرت ہوتی ہے کہ جو سعودی عرب کو اسلام کا ٹھیکے دار سمجھتے تھے۔ دراصل سعودی عرب ہی امریکہ اور اسرائیل کے عزائم کو سب سے زیادہ مدد اور تعاون فراہم کرنے والا نام نہاد اسلامی ملک ہے۔ ان ممالک نے اسرائیل کیساتھ تعلقات کا اعلان کرکے نہ صرف مظلوم فلسطینیوں بلکہ قبلہ اول کیساتھ بھی غداری کی ہے، انہیں خدا کبھی معاف نہیں کرے گا۔

اسلام ٹائمز: شہید قاسم سلیمانی اور شہید ابو مہدی المہندس کی برسی کی آمد ہے، کیا آپ سمجھتے ہیں کہ شہید قاسم سلیمانی کی شہادت کے بعد آزادی قدس تحریک پر کوئی فرق پڑیگا۔؟
علامہ ارشاد علی: میں سمجھتا ہوں کہ جو شہید قاسم سلیمانی کے حصے کا کام تھا، وہ شہادت سے بہت پہلے کرچکے تھے، ان کی آزادی قدس کیلئے خدمات سنہری حروف میں لکھی جائیں گی۔ انہوں نے فلسطینی عوام کے جذبہ کو تقویت بخشی، انہوں نے آزادی قدس کی تحریک کو تقویت بخشی۔ یہی وجہ تھی کہ وہ امریکہ اور اسرائیل کی آنکھ کا کانٹا تھے۔ جنرل قاسم سلیمانی کسی معمولی شخصیت کا نام نہیں، وہ اسلام دشمن قوتوں کیلئے موت کا پیغام تھے، ان کے مزموم عزائم کی راہ میں ایک بڑی رکاوٹ تھے۔ لیکن اس کا یہ مطلب نہیں کہ وہ چلے گئے تو قدس کے مسئلہ پر اس کا کوئی اثر پڑے گا، میں سمجھتا ہوں کہ وہ اپنی شہادت سے آزادی قدس کی تحریک کو مزید مضبوط کرگئے ہیں۔

اسلام ٹائمز: کیا وجہ ہے کہ شہید قاسم سلیمانی ایک برادر اسلامی ملک کے جرنیل تھے، لیکن انکی شہادت کے بعد انکے چاہنے والے دنیا کے ہر کونے سے منظرعام پر آئے۔؟
علامہ ارشاد علی: جب نیت نیک ہو اور آپ جو بھی کریں وہ خدا کی رضا کیلئے ہو تو خدا آپ کی محبت لوگوں کے دلوں میں ڈال دیتا ہے اور آپ کے دشمن کے دلوں میں آپ کا خوف، ایسا ہی جنرل سلیمانی کیساتھ تھا۔ میں سمجھتا ہوں کہ اہلبیت (ع)، صحابہ کرام اور دیگر مقدس ہستیوں کے مزارات کی حفاظت کرنے میں جنرل سلیمانی کا سب سے اہم کردار تھا، اسی وجہ سے ان کے چاہنے والے ایران سے باہر بھی موجود ہیں۔ اگر پاکستان ہی کی مثال لیں تو یہاں بہت ہی کم لوگ ہوں گے جو جنرل سلیمانی سے ملے ہونگے، لیکن مدافع حرم ہونے کی وجہ سے پاکستان میں ان کے لاتعداد چاہنے والے موجود ہیں۔ جس کا اظہار آپ نے ان کی شہادت کے موقع پر دیکھ لیا ہوگا۔

اسلام ٹائمز: کیا شہید قاسم سلیمانی کے بعد خطہ میں دہشتگردی کو فروغ دینے کے امریکی و صیہونی عزائم پورے ہوسکیں گے۔؟
علامہ ارشاد علی: شہید قاسم سلیمانی نے اس داعش کو صفحہ ہستی سے مٹا دیا، جس کے پیچھے اربوں ڈالر اور کئی دہائیوں کی منصوبہ بندی تھی۔ امریکہ، اسرائیل اور بعض عرب ممالک کا یہ منصوبہ جنرل سلیمانی نے خاک میں ملا دیا۔ میں سمجھتا ہوں کہ خطہ سے دہشتگردی کو ختم کرنے میں جنرل سلیمانی کا کردار کلیدی ہے۔ خطہ کے ممالک کو تو جنرل قاسم سلیمانی کا شکر گزار ہونا چاہئے تھا کہ ان کی وجہ سے داعش کو عراق، شام میں شکست ہوئی۔ امریکہ اپنے آلہ کاروں کے ذریعے اب بھی خطہ کے امن و امان کو خراب کرنے کے درپے ہے، لیکن مجھے امید ہے کہ اسے اس بار بھی شکست کا ہی سامنا کرنے پڑے گا۔ اگر یہ خائن عرب ممالک اسرائیل کو تسلیم کر رہے ہیں اور امریکہ کے ہر حکم پر لبیک کہہ رہے ہیں تو اسکا مطلب یہ نہیں کہ امریکہ اپنے عزائم میں کامیاب ہوگا۔ رہبر ولی امر مسلمین سید علی خامنہ ای کی قیادت میں خدا کے پاک بندے ان ناپاک عزائم کو ضرور خاک میں ملائیں گے۔

اسلام ٹائمز: شہید سلیمانی اور ابو مہدی المہندس کی پہلی برسی قریب ہے، انکے اعلانیہ قاتلوں کیخلاف کارروائی تو دور اقوام متحدہ یا دیگر عالمی ادارے آواز تک بلند نہ کرسکے، کیا امریکہ کیلئے کوئی قانون یا قاعدہ نہیں۔؟
علامہ ارشاد علی: اقوام متحدہ تو امریکہ کے زیر اثر ہے، ہونا تو یہ چاہیئے تھا کہ اقوام متحدہ عالمی قوانین کی اس خلاف ورزی پر ڈونلڈ ٹرمپ اور دیگر امریکی ذمہ داران کیخلاف کارروائی کرتا، پوچھا جاتا کہ آپ نے ایک ملک کا جرنیل سرعام کیسے مار دیا۔؟ اگر کوئی امریکہ کا جرنیل مار دیتا تو کیا دنیا کا یہ ردعمل ہوتا۔؟ افسوس کیساتھ کہنا پڑتا ہے کہ یہاں دہرا معیار ہے۔ کم از کم مسلم ممالک کو امریکہ کی اس بدمعاشی پر ایکشن لینا چاہیئے تھا۔ اگر پاکستان کی بات کروں تو اس حوالے سے ہماری حکومت کا موقف بھی بہت کمزور تھا۔ عالمی قوانین کی خلاف ورزی پر امریکہ کیخلاف کیوں کارروائی نہیں کی جاتی، اس کی مرضی ہے کہ یہ جب چاہے کسی ملک پر حملہ کر دے، کسی ملک کے جرنیل کو مار دے، کسی بھی ملک پر قبضہ کرلے، کیا اسے کوئی پوچھنے والا نہیں ہے۔؟

اسلام ٹائمز: شہید سلیمانی، شہید ابو مہدی اور انکے رفقاء کی پہلی برسی کے موقع پر امت مسلمہ کیلئے کیا پیغام دینا چاہیں گے۔؟
علامہ ارشاد علی: میں یہی گزارش کروں گا کہ دنیا ان ہستیوں کو تعصب کی عینک اتار کر دیکھے، یہ کسی ملک یا کسی خاص مسلک کے نمائندے نہیں تھے، یہ عالم اسلام کے مجاہد تھے۔ انہوں نے اسلام کے مفاد کی جنگ لڑی ہے، وہ شہید ہوئے ہیں، ان پر ظلم ڈھایا گیا، عالم اسلام کو چاہیئے کہ دوست اور دشمن میں فرق کرے۔ امریکہ اور اسرائیل کبھی ہمارے دوست نہیں ہوسکتے، ان شہداء نے اسلام کی خاطر قربانی دی۔ ان شہداء کی قربانی کو یاد رکھنا اور ان کے نقش قدم پر چلنا امت پر قرض ہے۔ میں سمجھتا ہوں کہ مکتب سلیمانی کو اپنا کر ہی امت مسلمہ اپنا راستہ تلاش کرسکتی ہے۔ ان شہداء نے ملت کو ایک گائیڈ لائن فراہم کر دی ہے۔ خدا ان عظیم شہدء کے درجات مزید بلند کرے اور ہمیں انکا مشن مکمل کرنے کرنے کی توفیق عطا کرے۔ آمین، بہت شکریہ۔