ہم حزب اللہ کے قیام کی سالگرہ کو فخر سے مناتے ہیں، تیونسی رہنماء
28 Jun 2022 22:52
میڈیا سے گفتگو میں الکحلاوی کا کہنا تھا کہ حزب اللہ ایک ایسی جماعت ہے، جسکے قول و فعل میں تضاد نہیں، اور اس نے 2000ء میں صیہونی غاصبوں کو غیر مشروط طور پر جنوبی لبنان سے بھاگ جانے پر مجبور کیا۔
اسلام ٹائمز۔ تیونس میں مقاومت کی حامی اور اسرائیل سے تعلقات معمول پر لانے کے خلاف، ایک تنظیم کے سربراہ کا کہنا ہے کہ حزب اللہ ہمارے لئے باعث افتخار ہے کہ جو اسرائیل کو کئی بار شکست دینے میں کامیاب ہوئی۔ حزب اللہ لبنان کی چالیسویں سالگرہ کے موقع پر تیونس کے عوام کے مختلف طبقات نے تحریک سے اپنے تعلق پر زور دیتے ہوئے صیہونیوں کے خلاف جنگ میں حزب اللہ کی قربانیوں کو سراہا۔ مقاومت کے حامی اور اسرائیل سے تعلقات معمول پر نہ لانے کے لئے تیونس میں بننے والی ایک تنظیم کے سربراہ ''احمد الکحلاوی'' کا نجی نیوز چینل سے بات کرتے ہوئے کہنا تھا کہ حزب اللہ خود قربانی اور عفو کا ایک ایسا سچا نمونہ ہے، جس نے فلسطین کی آزادی اور پناہ گزینوں کی واپسی کی امید لوگوں میں زندہ کر دی ہے۔ الکحلاوی نے کہا کہ تیونس کے عوام فخر کے ساتھ حزب اللہ کے قیام کی سالگرہ مناتے ہیں، انہوں نے مزید کہا کہ حزب اللہ ایک ایسی جماعت ہے، جس کے قول و فعل میں تضاد نہیں اور اس نے 2000ء میں صیہونی غاصبوں کو غیر مشروط طور پر جنوبی لبنان سے بھاگ جانے پر مجبور کیا۔
خبر کا کوڈ: 1001666