اسلام ٹائمز - جلوس عزا بھی ہوگا اور مجلس بھی بپا ہوگی لیکن حکومت کا چہرہ کالا ہوجائے گا، شیعہ تنظیمیں

جلوس عزا بھی ہوگا اور مجلس بھی بپا ہوگی لیکن حکومت کا چہرہ کالا ہوجائے گا، شیعہ تنظیمیں

کراچی کے نشتر پارک میں پریس کانفرنس سے خطاب کرتے ہوئے شیعہ تنظیموں کے رہنماؤں نے کہا کہ نہایت افسوس کے ساتھ کہنا پڑھ رہا ہے آج 1444 ہجری کا آغاز ہوچکا ہے لیکن انتظامیہ کی نااہلی کے باعث عزاداران سید الشہدا (ع) سخت اذیت اور مشکلات سے دوچار ہیں۔

اسلام ٹائمز۔ سندھ بھرخصوصاً کراچی میں محرم الحرام کے آغاز کے باوجود مجالس وجلوس ہائے عزا کے مقامات اور راستوں پر صفائی ستھرائی، روشنی اور سٹرکوں کی استر کاری کے کام شروع نہ کئے جانے کے خلاف جعفریہ الائنس پاکستان کی جانب سے کراچی نشتر پارک میں شیعہ تنظیموں کی مشترکہ پریس کانفرنس منعقد ہوئی۔ پریس کانفرنس میں ملت جعفریہ کی تنظیموں کے ذمہ داران نے حکومت سے مطالبہ کیا ہے کہ مجالس و عزاداری کے دوران کوئی رکاوٹ نہیں آنی چاہیئے، اگر کسی بھی قسم کا کوئی واقعہ رونما ہوا تو اس کی ذمہ داری حکومت پر عائد ہوگی۔ کراچی نشتر پارک میں شیعہ علما کونسل، مجلس وحدت مسلمین، آئی ایس او، مجلس ذاکرین امامیہ، امامیہ آرگنائزیشن، تنظیم عزا، تنظیم عزاداری، پاک محرم، ہیئت آئمہ مساجد و علماء امامیہ، ڈسٹرکٹ کے کوآرڈینیٹر، اسکاؤٹس کے نمائندگان اور دیگر رہنماؤں نے پریس کانفرنس کی۔ رہنماؤں نے پریس کانفرنس سے خطاب کرتے ہوئے کہا کہ محرم الحرام کا آغاز ہوچکا ہے اور چودہ سو سال پہلے کربلا میں بلند ہونے والی آواز حق کی یاد میں مجالس و عزاداری کا اہتمام کیا جاتا ہے لیکن نہایت افسوس کے ساتھ کہنا پڑھ رہا ہے آج 1444 ہجری کا آغاز ہوچکا ہے لیکن انتظامیہ کی نااہلی کے باعث عزاداران سید الشہدا (ع) سخت اذیت اور مشکلات سے دوچار ہیں۔ ان کا کہنا تھا کہ گذشتہ چند روز سے وزیراعلیٰ سے لیکر نچلی سطح پر صرف ملاقاتیں اور اجلاس ہورہے ہیں لیکن صرف وعدوں، باتوں اور فوٹو سیشن کے کوئی اور چیز نظر نہیں آتی جس کو دیکھ کر یہ محسوس کیا جاسکے کہ عملی اقدامات ہورہے ہیں۔

رہنماؤں نے مزید کہا کہ شہر کراچی گندگی کا ڈھیر بنا ہوا ہے، وزیراعلیٰ اور ان کے وزراء یا تو اقرار کریں کے وہ ناکام ہوچکے ہیں یا پھر جو وعدے کئے گئے ہیں انہیں پورا کیا جائے۔ انہوں نے کہا کہ جلوس بھی ہوگا اور مجلس بھی بپا ہوگی لیکن صوبائی حکومت کا چہرہ کالا ہوجائے گا، یہ بارش کوئی اچانک نہیں ہوئی، گذشتہ تین چار سالوں سے محرم الحرام بارشوں کے موسم میں آرہا ہے لیکن حکومت سندھ کی جانب سے کوئی مؤثر اقدامات نہیں کئے جاتے۔ رہنماؤں نے کہا کہ اربوں روپے کا بجٹ کہاں جاتا ہے، کراچی کی ترقی کے لئے بجٹ آیا تھا وہ کہاں ہے۔ انہوں نے کہا کہ خربوزے کو دیکھ کر خربوزہ رنگ پکڑتا ہے، کے الیکٹرک مافیہ بنی ہوئی ہے جس نے شہر میں لوٹ مار کا بازار گرم کررکھا ہے، کے الیکٹرک نے اربوں روپے شہر قائد کے باسیوں سے بٹورے ہیں عزاداری سید شہدا میں کسی قسم کی رکاوٹ نہیں آنی چاہیئے، اگر عزاداری اور مجلس کے دوران کوئی واقعہ رونما ہوا تو اس کی ذمہ داری وزیراعلیٰ، آئی جی اور کے الیکٹرک پر عائد ہوگی، کراچی کے سوک معاملات کسی سے پوشیدہ نہیں ہیں، ملت جعفریہ اقلیت نہیں ہے بلکہ لارجر ٹیکسٹ پیئر ہیں لہذا جو مسائل ہیں وہ سننے جائیں اور اسے فوری حل کیا جائے۔