QR Code

غم امام حسینؑ ارادہ و منصوبہ پروردگار ہے، اسے بھلا کون کم رنگ کرسکتا ہے، علامہ شہنشاہ نقوی

1 Aug 2022 20:48

عشرہ محرم کی دوسری مجلس سے خطاب کرتے ہوئے معروف عالم دین کا کہنا تھا کہ آئمہ اہلبیتؑ نے اپنے عمل و کردار سے بھی انسانوں کے لئے مستحکم اور پختہ خطوط چھوڑے ہیں جس سے بنی نوع انسان ترقی اور کمال کے راستے پر گامزن ہوسکتی ہے۔

اسلام ٹائمز۔ پاک محرم ایسوسی ایشن کے زیرِ اہتمام نشترپارک میں مرکزی عشرہ محرم الحرام کی دوسری مجلس عزا سے معروف عالم دین علامہ شہنشاہ حسین نقوی نے عقیدہ امامت کے موضوع پر خطاب کرتے ہوئے کہا کہ آئمہ اہلبیت علیہ السلام نے اپنے اقوال و فرامین کی صورت میں بنی نوع انسان کے لئے اعلیٰ ترین کلیہ قاعدہ اور قانون فراہم کیا ہے، آئمہ اہلبیتؑ نے اپنے عمل و کردار سے بھی انسانوں کے لئے مستحکم اور پختہ خطوط چھوڑے ہیں جس سے بنی نوع انسان ترقی اور کمال کے راستے پر گامزن ہوسکتی ہے، لہٰذا ہم کہہ سکتے ہیں کہ آئمہ اہلبیتؑ کی زندگی سختیوں اور معاشرے میں پائے جانے والی کمزرویوں خرابیوں اور ضعف کے خلاف مسلسل تحریک تھی۔

علامہ شہنشاہ نقوی نے مزید کہا کہ یہ ایام محرم و عاشورا اور یہ موسم عزا انسانوں کو امامت جو کہ رسالت کے سائے میں ہے تازگی فراہم کرنے کا مہینہ ہے تاکہ انسان اپنی ذمہ داریوں کی جانب متوجہ ہو اور اجتماعی مسائل کی شناخت میں کسی قسم کی کمزوری کا شکار نہ ہو اور ذاتی و شخصی اعتبار سے بھی اپنے امور میں منظم ہوسکے۔ انہوں نے مزید کہا کہ غم امام حسینؑ ارادہ و منصوبہ پروردگار ہے اسے بھلا کون کم رنگ کرسکتا ہے، نواسہ رسولؑ کے ذکر میں اور کربلا والوں کے غم میں مسلمانوں کے تمام تر مسالک کا اتحاد و اتفاق ضروری ہے، رب کریم یہ عظیم القدر توفیق اور سعادت سب کو عطا فرمائے۔

خبر کا کوڈ: 1007122