کراچی میں ایم کیو ایم رہنماؤں کا بوتراب اور انچولی کے امام بارگاہوں کا دورہ، منتظمین سے ملاقات

اسلام ٹائمز۔ متحدہ قومی موومنٹ پاکستان کی رکن رابطہ کمیٹی و سابق ڈپٹی میئر ارشد حسن نے وفد کے ہمراہ محرم الحرام کے سلسلے میں عزیز آباد میں واقع بوتراب اور انچولی امام بارگاہوں کا دورہ کیا اور منتظمین سے ملاقات کی۔ ایم کیو ایم پاکستان کے وفد میں اراکین رابطہ کمیٹی شکیل احمد، نعیم صدیقی، سی او سی کے جوائنٹ انچارج محمد نعیم، علماء کمیٹی کے انچارج عارف شاہ، اراکین علماء کمیٹی، ٹاؤن کے ذمہ داران اور نامزد بلدیاتی پینل بھی موجود تھے۔ وفد نے مجلس میں شرکت کی۔ بعد ازاں مجلس کے منتظمین سے ملاقات کی ان سے انکے مسائل سے آگاہی حاصل کی۔

اس موقع پر ارشد حسن نے وہاں پر موجود منتخب نمائندوں اور بلدیاتی نمائندوں کو موقع پر ہدایت جاری کی وہ منتظمین سے رابطہ میں رہیں۔ رکن رابطہ کمیٹی شکیل احمد نے جلوس اور مجالس کے دوران امن و امان کی صورتحال کو برقرار رکھنے کیلئے چوکس رہنے کی ہدایت کی اور کہا کہ عزادران حسینؑ کو ہر قسم کی سہولت فراہم کی جائے۔ منتظمین نے ایم کیو ایم پاکستان کے رہنماؤں کی آمد پر شکریہ ادا کیا اور کہا کہ شہر میں امن و امان اور فرقہ وارانہ ہم آہنگی کے فروغ میں ایم کیو ایم پاکستان کا کردار ناقابل فراموش ہے۔