اسلام ٹائمز - ناراض ہونے والے بلوچ ہمارے بھائی ہیں، انکو واپس آنے کی دعوت دیتی ہوں، فرح عظیم شاہ

ناراض ہونے والے بلوچ ہمارے بھائی ہیں، انکو واپس آنے کی دعوت دیتی ہوں، فرح عظیم شاہ

کراچی پریس کلب میں میڈیا سے بات چیت کرتے ہوئے ترجمان بلوچستان حکومت نے کہا کہ ہمیں بھٹکنے والے بلوچوں سے بھی پیار ہے، بلوچستان سونے کی چڑیا ہے، بلوچستان کیوں بیرونی سازشوں کا شکار رہتا ہے اس کی بڑی وجہ اتحاد کا نہ ہونا ہے۔

اسلام ٹائمز۔ بلوچستان حکومت کی ترجمان فرح عظیم شاہ نے کہا ہے ناراض ہونے والے بلوچ ہمارے بھائی ہیں، ان کو واپس آنے کی دعوت دیتی ہوں، بلوچستان میں اس مرتبہ معمول سے زیادہ بارشیں ہوئی ہیں، تمام اضلاع میں ریسکیو کا عمل جاری ہے، پاک فوج کے جوان بھی بحالی کے کاموں میں بھرپور حصہ لے رہے ہیں، سوشل میڈیا پر افواج پاکستان کے خلاف منفی باتیں پھیلائی جارہی ہیں، سوشل میڈیا کے ذریعہ بیانات دے کر پاکستان کے خلاف سازش کی جارہی ہے۔ ان خیالات کا اظہار انہوں نے کراچی پریس کلب میں میڈیا سے بات چیت کرتے ہوئے کیا۔ فرح عظیم شاہ نے کہا کہ بلوچستان میں اس بار معمول سے زیادہ بارشیں ہوئی ہیں، تمام اضلاع میں ریسکیو کا کام جاری ہے، کچھ مقامات پر ریسکیو کے کام میں دشواری کا سامنا رہا وہاں ہیلی کاپٹر کے ذریعے کام کیا گیا، پاک فوج کے جوانوں نے بھی ریسکیو کے کام میں بڑھ چڑھ کر حصہ لیا، جنرل سرفراز نے بھی حادثے سے پہلے وہاں ریسکیو کے کام کا معائنہ کیا تھا۔ انہوں نے کہا کہ سوشل میڈیا پر افواج کے بارے میں کافی گند پھیلایا گیا ہے، ہمیں سب سے پہلے پاکستان کے بارے میں سوچنا ہے، میڈیا جو بھی جو دکھائے گا لوگ وہی سیکھیں گے۔

فرح عظیم شاہ نے کہا کہ کچھ عناصر سوشل میڈیا کے ذریعے بیانات دے کر پاکستان کے خلاف سازشیں کرنے میں مصروف ہیں، بلوچستان میں ہم اب بحالی کے عمل داخل ہوچکے ہیں، بلوچستان میں امن و امان کا بھی کافی مسئلہ تھا جو اب بہتری کی جانب گامزن ہے۔ انہوں نے کہا کہ دو ماہ بعد بلوچستان میں سرد موسم کا آغاز ہوجائے گا، جن کے گھر تباہ ہوئے ہیں انکے گھر دوبارہ تعمیر کئے جائیں گے، ہم بلوچستان کے عوام کو کسی طور تنہا نہیں چھوڑیں گے، کہیں کسی وجہ سے ریسکیو کا کام شروع نہ ہوسکے تو موسم کی وجہ سے وہاں پہنچے میں مشکل ہوتی ہے۔ انہوں نے کہا کہ میں بلوچستان کے ناراض ہونے والوں کو واپس آنے کی دعوت دیتی ہوں، ناراض ہونے والے بھی ہمارے بہن بھائی ہیں، ہمیں بھٹکنے والے بلوچوں سے بھی پیار ہے، بلوچستان سونے کی چڑیا ہے، بلوچستان کیوں بیرونی سازشوں کا شکار رہتا ہے اس کی بڑی وجہ اتحاد کا نہ ہونا ہے۔