اسلام ٹائمز۔ حکومت کی جانب سے سرکاری سکیم کے تحت حج کیلئے جانیوالے حجاج کرام کو ڈیڑھ لاکھ روپے حج سپورٹ رقم کی واپسی سترہ اگست سے شروع کرنے کا اعلان کر دیا گیا ہے۔ حج سپورٹ فنڈ کی مد میں سرکاری حجاج کرام کو پانچ ارب دس کروڑ تہتر لاکھ پچاس ہزار روپے کی تقسیم کا عمل سترہ اگست سے اکتیس اگست تک مکمل کر لیا جائے گا۔ حجاج کرام کو رقوم کی واپسی کی اطلاع بذریعہ موبائل فون پیغام سے کی جائے گی۔ حجاج کرام قومی شناختی کارڈ، وزارت مذہبی امور کا پیغام، پاسپورٹ سمیت دیگر کوائف دکھا کر رقم لے سکیں گے۔ وفاقی حکومت نے مہنگائی کی وجہ سے سرکاری حج پر ریلیف دینے کا اعلان کیا تھا جس کے بعد حج آپریشن مکمل ہونے پر اضافی رقوم واپس کرنے کا بھی اعلان کر دیا گیا ہے۔