اسلام ٹائمز۔ عراق میں الصدر تحریک کے سربراہ نے اپنے حامیوں کی جانب سے آئندہ ہفتے مظاہروں کے انعقاد کو ملتوی کر دیا ہے۔ الصدر تحریک کے سربراہ "سید مقتدیٰ الصدر" نے آج منگل کے روز اپنے بیان میں سنیچر کے دن ہونے والے مظاہروں کو ملتوی کرنے کا اعلان کر دیا ہے۔ انہوں نے اپنے ٹویٹر پر لکھا کہ سنیچر کے روز ہونے والا ملین مارچ اگلی اطلاع تک ملتوی کر دیا گیا ہے، تاہم عراقی عوام کا دھرنا ان کے مطالبات کی منظوری تک جاری رہے گا۔ الصدر نے اعلان کیا کہ عراق، عراقی عوام اور مقدسات سے عشق کی وجہ سے ہفتے کے روز ہونے والے ملین مارچ کو اگلی اطلاع تک ملتوی کرتا ہوں۔
یاد رہے کہ گذشتہ شب سید مقتدیٰ الصدر کے قریبی ترین ساتھی سمجھے جانے والے الصدر تحریک کے رہنماء "محمد صالح العراقی" نے کہا ہے کہ اگرچہ ہم اپنی سپریم کورٹ میں اصلاحات کے حامی ہیں، لیکن اس کے باوجود ہماری عدلیہ اور اس کا احاطہ ہمارے لئے ریڈ لائن ہے۔