تمام اتحادیوں اور پارٹی کا وزیراعلیٰ پر بھرپور اعتماد ہے، سردار عبدالرحمان کھیتران

اسلام ٹائمز۔ بلوچستان عوامی پارٹی کے ترجمان سردار عبدالرحمان کھیتران نے اپنے بیان میں بلوچستان کابینہ میں جے یو آئی کی شمولیت سے متعلق کہا ہے کہ بلوچستان کی صوبائی کابینہ سے کسی وزیر کو فارغ نہیں کیا جا رہا ہے۔ تمام اتحادیوں اور پارٹی کا وزیراعلیٰ پر بھرپور اعتماد ہے۔ انہوں نے کہا کہ سوشل میڈیا اور بعض چینلز پر تین وزراء کو نکالنے کی خبروں میں کوئی صداقت نہیں۔ وزیراعلیٰ نے گزشتہ روز ہی میڈیا سے بات چیت کے دوران ان خبروں کی تردید کی تھی۔ سردار عبدالرحمان کھیتران نے کہا کہ میڈیا ایسی خبریں جاری اور نشر کرنے سے قبل انکی سچائی کی تصدیق کرے۔ بلا تحقیق جاری کی گئی خبروں سے سیاسی غلط فہمیاں پیدا ہونے کا احتمال ہوتا ہے۔