اسلام ٹائمز - ملک کو لوٹا جا رہا ہو تو کیا محافظ کہہ سکتا ہے کہ میں نیوٹرل ہوں؟ عمران خان

ملک کو لوٹا جا رہا ہو تو کیا محافظ کہہ سکتا ہے کہ میں نیوٹرل ہوں؟ عمران خان

پشاور میں تقریب سے خطاب کرتے ہوئے سابق وزیراعظم کا کہنا تھا انسانوں کے معاشرے میں کوئی قانون سے اوپر نہیں ہوتا اور جانوروں کے معاشرے میں انصاف و قانون نہیں ہوتا، بڑے ڈاکو پیسہ چوری کرکے باہر لے گئے اور ان کو این آر او دیا گیا۔

اسلام ٹائمز۔ چیئرمین پاکستان تحریک انصاف عمران خان کا کہنا ہے کہ ملک کو لوٹا جا رہا ہو تو کیا محافظ کہہ سکتا ہے کہ میں نیوٹرل ہوں۔ پشاور میں تقریب سے خطاب کرتے ہوئے عمران خان کا کہنا تھا انسانوں کے معاشرے میں کوئی قانون سے اوپر نہیں ہوتا اور جانوروں کے معاشرے میں انصاف و قانون نہیں ہوتا۔ ان کا کہنا تھا کہ بڑے ڈاکو پیسہ چوری کرکے باہر لے گئے اور ان کو این آر او دیا گیا، مریم سے پوچھا گیا تو کہا کہ لندن میں کیا پاکستان میں بھی پراپرٹی نہیں، 1100 ارب روپے جو اس قوم کا چوری ہوا وہ معاف ہو رہا ہے، یہ پیسہ چند لوگوں کی جیبوں میں جائے گا، قوم آج بدترین مہنگائی اور قرضوں میں ڈوب رہی ہے۔ انہوں نے کہا کہ آج اس ملک کے محافظ سے سوال پوچھتا ہوں کہ اگر ڈاکو ملک کو لوٹ رہا ہو تو چوکیدار کہہ سکتا ہے کہ میں نیوٹرل ہوں۔

انہوں نے کہا کہ پاکستان لوٹا جا رہا ہے اور وہاں سے کہتے ہیں کہ ہم نیوٹرل ہیں، نیوٹرل کا یہ کام ہے کہ میڈیا کو بند کریں تو ملک کی حفاظت کون کرے گا، جب بھی کوئی کہے کہ میں غیرسیاسی ہوں تو سمجھ لیں کہ اس میں اور جانور میں کوئی فرق نہیں۔ عمران خان نے کہا کہ ساری قوم کو کال دوں گا تو واپسی نہیں ہو گی، مجھے اکیلے بھی نکلنا پڑے تو ان کے خلاف نکلوں گا لیکن ان چوروں کا ڈاکہ قبول نہیں کروں گا، مجھے جیل کا خوف نہیں ہے۔