0
Sunday 20 Nov 2022 14:00

تعلیم میں تشدد کا عنصر شرمناک ہے، علامہ مقصود ڈومکی

تعلیم میں تشدد کا عنصر شرمناک ہے، علامہ مقصود ڈومکی
اسلام ٹائمز۔ مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ضلع راجن پور کے شہر جام پور میں مولانا مظہر حسین کی رہائشگاہ پر علماء کرام سے ملاقات کی اور ان سے تبلیغی خدمات اور قومی مسائل کے حوالے سے گفتگو کی۔ اس موقع پر علماء کرام اور مبلغین سے خطاب کرتے ہوئے علامہ مقصود علی ڈومکی نے کہا کہ قرآن کریم کی رو سے تبلیغ دین وہی کر سکتے ہیں جو خدا سے ڈرتے ہیں اور خدا کے سوا کسی سے نہیں ڈرتے۔ جو لوگ خدا سے نہیں ڈرتے، وہ دین خدا کی تبلیغ نہیں کر سکتے اور جو خدا کے سوا دوسرے لوگوں سے ڈرتے ہیں وہ بھی تبلیغ دین کا حق ادا نہیں کر سکتے۔

خوف خدا و خشیت الٰہی کی عملی تصویر انبیاء کرام اور آئمہ اہل بیت علیہم السلام کی حیات طیبہ ہے۔ خشیت الٰہی کا ہی ثمر ہے کہ انہوں نے ہر فرعون اور یزید کے مقابل بے خوف ہوکر کلمہ حق بلند کیا۔ انہوں نے کہا کہ قصہ گوئی تبلیغ دین کا اہم عنصر ہے۔ قرآن کریم کے قصے احسن القصص ہیں اور ان قصوں کا بیان انسان اور معاشرے کی تربیت اور اصلاح کا سبب ہے۔ مبلغین اور معلمین کو چاہئے کہ وہ بچوں کو انبیاء کرام اہل بیت علیہم السلام اور شہداء و صلحاء کے قصوں سے آشنا کریں۔ انہوں نے کہا کہ تعلیم میں تشدد کا عنصر شرمناک ہے۔ طالب علم پر تشدد کرنا یا بچوں کی توہین اور تذلیل کرنا کسی طور پر بھی والدین یا اساتذہ کو زیب نہیں دیتا۔ مساجد اور اسکولوں میں طلباء پر تشدد کو جرم قرار دے کر اس کا مکمل سدباب کیا جائے۔
خبر کا کوڈ : 1025753
رائے ارسال کرنا
آپ کا نام

آپکا ایمیل ایڈریس
آپکی رائے

منتخب
ہماری پیشکش