کنور خالد یونس نے ایم کیو ایم لندن سے لاتعلقی کا اظہار کردیا

اسلام ٹائمز۔ کنور خالد یونس نے ایم کیو ایم لندن سے لاتعلقی کا اظہار کردیا، ایم کیو ایم لندن نے مارچ میں کنور خالد یونس کو ڈپٹی کنوینر مقرر کرنے کا اعلان کیا تھا۔ تفصیلات کے مطابق سندھ ہائیکورٹ میں سابق رکن قومی اسمبلی کنور خالد کی نظر بندی کے خلاف درخواست پر سماعت ہوئی۔ کنور خالد یونس نے ایم کیو ایم لندن سے لاتعلقی کا اظہار کردیا، شوکت حیات ایڈووکیٹ نے عدالت میں بتایا کہ درخواست گزار نے پولیس اور رینجر حکام کے روبرو پیش ہوکر بتایا کہ سیاسی سرگرمیوں سے کوئی تعلق نہیں۔ درخواست گزار نے کہا کہ متحدہ قومی موومنٹ لندن سمیت کسی سیاسی جماعت کی سرگرمی میں ملوث نہیں۔

کنور خالد یونس کا عدالت میں کہنا تھا کہ عمر 78 سال ہوچکی ہے، متعدد امراض کا شکار ہوں۔ وکیل شوکت حیات ایڈووکیٹ نے استدعا کی کہ نظر بندی کا حکم غیر قانونی قرار دیا جائے، درخواست میں آئی جی سندھ،ہوم سیکرٹری اور ایس ایس پی جنوبی کو فریق بنایا گیا ہے۔ سرکاری وکیل نے عدالت میں کہا کہ ایم پی او کے تحت نظر بندی کے نوٹیفکیشن کی مدت ختم ہوچکی، نوٹیفیکشن کی مدت ختم ہونے کے بعد درخواست کی سماعت کا جواز نہیں رہا، جس پر عدالت نے غیر موثر ہونے پر درخواست نمٹا دی۔ یاد رہے ایم کیو ایم لندن نے مارچ میں کنور خالد یونس کے ڈپٹی کنوینر مقرر کرنے کا اعلان کیا تھا، جس کے بعد حکومت سندھ نے اپریل میں انکی نظر بندی کا نوٹیفیکشن جاری کردیا تھا۔