ایران کے شہر دارخوین میں نیوکلیئر پاور پلانٹ کے منصوبے کا افتتاح
3 Dec 2022 13:00
یہ پاور پلانٹ ایرانی اٹامک انرجی کے منصوبے کے تحت آٹھ سال کے عرصے میں مکمل کیا جائیگا۔ اس منصوبے کے تحت جوہری بجلی کے حصول کیلئے مقامی ایٹمی پاور پلانٹس بنائے جائیں گے۔
اسلام ٹائمز۔ آج اسنیچر کی صبح ایران کے صوبے خوزستان کے ضلع "دارخوین" میں 300 میگا واٹ بجلی بنانے کے پہلے منصوبے "کارون ایٹمی گرڈ اسٹیشن" کے تعمیراتی کام کا افتتاح کر دیا گیا۔ اس موقع پر ایرانی اٹامک پروگرام کے سربراہ "محمد اسلامی" اور اس صنعت سے وابستہ دیگر سینیئر مسئولین بھی موجود تھے۔ "کارون" ایٹمی پاور پلانٹ میں پریشرائزڈ لائٹ واٹر (PWR) سے 300 میگا واٹ بجلی بنائی جائے گی، تقریباً 50 ہیکٹر رقبے پر مشتمل یہ منصوبہ صوبہ خوزستان میں "دارخوین" کے نزدیک دریائے کارون پر شروع کیا گیا ہے۔ ہلکے پانی پر دباو ڈال کر بجلی بنانے والے پاور پلانٹس دنیا کے سب سے عام جوہری پاور پلانٹس ہیں، جو ہلکے پانی کو کولنٹ (coolant) اور ریٹارڈر (retarder) کے طور پر استعمال کرتے ہیں اور اس قسم کے ری ایکٹرز کو چار فی صد افزودہ یورینیم آکسائیڈ سے چلایا جاتا ہے۔
خبر کا کوڈ: 1028232