اسلام ٹائمز - مشکل وقت میں ایثار اور قربانی کے جذبے کیساتھ محنت کرنیکی ضرورت ہے، شہباز شریف

مشکل وقت میں ایثار اور قربانی کے جذبے کیساتھ محنت کرنیکی ضرورت ہے، شہباز شریف

اسلام آباد میں گرین لائن ٹرین سورس کی افتتاحی تقریب میں وزیر ریلوے خواجہ سعد رفیق، وزیر خزانہ سینیٹر اسحاق ڈار، وزیر منصوبہ بندی پروفیسر احسن اقبال نے بھی خطاب کیا۔

اسلام ٹائمز۔ وزیراعظم محمد شہباز شریف نے اسلام آباد میں گرین لائن ٹرین سورس کی افتتاحی تقریب سے خطاب کرتے ہوئے کہا ہے کہ مشکلات کا ڈٹ کر مقابلہ کرنے والی قومیں ہی ترقی کرتی ہیں، ملک کو موجودہ گرداب سے نکالیں گے، توقع ہے کہ آئی ایم ایف سے معاہدہ رواں ماہ ہوجائے گا، گزشتہ حکومت کی جانب سے اداروں پر بے بنیاد الزام تراشی اور چینی کمپنیوں پر کرپشن کے الزامات سے چینی حکام کو تکلیف پہنچی، ان تعلقات کو معمول پر لانے کے لئے برف پگھل رہی ہے، ایم ایل۔ون منصوبہ کی تکمیل ہماری اولین ترجیح ہے، دن رات محنت کر کے دنیا میں اپنا کھویا ہوا مقام حاصل کریں گے، دنیا میں حکومتیں گورننس کی ذمہ دار ہیں، وہ ادارے نہیں چلاتیں، ہم نے زرمبادلہ کے ذخائر کو مدنظر رکھ کر اپنی ترجیحات کا تعین کیا ہے۔

وزیراعظم محمد شہباز شریف نے گرین لائن ٹرین سروس کا افتتاح کیا۔ اس موقع پر وزیر ریلوے خواجہ سعد رفیق، وزیر خزانہ سینیٹر اسحاق ڈار، وزیر منصوبہ بندی پروفیسر احسن اقبال نے بھی خطاب کیا۔ وزیراعظم نے تقریب سے خطاب کرتے ہوئے کہا کہ کہ گرین لائن جس کی بنیاد نواز شریف کے گزشتہ دورمیں رکھی گئی تھی اور بدقسمتی سے بے شمار دیگر منصوبوں کی طرح یہ منصوبہ بھی بعد کی حکومت میں دم توڑ گیا، ہم اس سروس کا از سرنو اجرا کرنے پر ہم اللہ تعالیٰ کا شکر ادا کرتے ہیں اور وزیر ریلوے اور چینی کمپنیوں کو مبارکباد پیش کرتے ہیں۔ وزیر اعظم نے کہا کہ ابھی ویگنز کا معائنہ کیا یہ جدید سہولیات سے آراستہ ہیں، وزیر ریلوے آئوٹ سورسنگ پر یقین رکھتے ہیں اور دور حاضر میں ترقی کا زینہ یہی ہے، اس سے ریلوے میں بہتری آئے گی اور پاکستان ریلوے کو فائدہ ہوگا۔

انہوں نے کہا کہ حکومتوں کا کام ادارے چلانا نہیں، بلکہ گورننس ہوتا ہے۔ انہوں نے کہا کہ حکومتیں آتی جاتی رہتی ہیں، پاکستان آج اس دوراہے پر کھڑا ہے، جہاں ایک ایک پائی بچانے کی کوشش کررہے ہیں۔ غیر ملکی ذرمبادلہ کے ذخائر کی صورتحال دیکھ کر ہم نے ترجیحات مقرر کی ہیں، جس میں خوراک اور ادویات کی درآمد کو اولین ترجیح دی گئی ہے، پوری امید ہے کہ آئی ایم ایف سے اسی ماہ معاہدہ ہو جائے گا اور ان مشکلات سے نکل آئیں گے۔ انہوں نے کہا کہ یہ مشکل وقت ہے، پاکستان دنیا میں ماحولیاتی آلودگی میں محض ایک فیصد حصہ کا رکھنے کے باوجود اس کا شکار ہوا اور بدترین سیلاب آیا، اتحادی حکومت دن رات ملک کو مشکلات سے نکالنے کے لئے کوشاں ہے، خواجہ سعد رفیق میرٹ کی بالادستی پر یقین رکھتے ہیں، ریلوے کو دیگراداروں کی طرح مشکلات کا سامنا ہے۔

انکا کہنا تھا کہ قوموں کی زندگی میں مشکلات آتی رہتی ہیں اس کا سامنا کرکے آگے بڑھنے والی قومیں ہی ترقی کرتی ہیں یہی اس مخلوط حکومت کا وژن ہے اور اس پر پوری طرح عمل پیرا ہیں۔ انہوں نے کہا کہ ایم ایل۔ون ہمارے ترجیحی ایجنڈے میں شامل ہے، چین کی حکومت اس منصوبے کو تیزی سے آگے بڑھانے کے لئے پرعزم ہے، حالیہ چین کے دورے پر چین نے ہمارا بھرپور اور گرمجوشی سے استقبال کیا، چینی زعما اور عوام پاکستان سے والہانہ محبت کرتے ہیں، گزشتہ چار سال میں تعلقات کو جو ٹھیس پہنچی ان کو واپس لانا آسان کام نہیں تاہم برف پگھل رہی ہے، چینی حکومت اور عوام کے شکرگزار ہیں کہ وہ پاکستانی عوام کے لئے بے پناہ محبت کے جذبات رکھتے ہیں، ہمیں اپنے پائوں پر کھڑا ہونے کےلئے اس روش کو بدلنا ہوگا، محنت کو اپنا شعار بنانا ہوگا، ہم کب تک دوسروں کے سہارے پر رہیں گے، یہ سفر مشکل ضرور ہے لیکن ہم دن رات محنت کرکے ملک کو آگے بڑھائیں گے اور ملک اپنا کھویا ہوا مقام حاصل کرے گا۔