دہلی یونیورسٹی میں بی بی سی فلم کی نمائش پر ہنگامہ، 24 افراد گرفتار

اسلام ٹائمز۔ گجرات مسلم نسل کشی پر بنی بی بی سی کی دستاویزی فلم پر تنازع بڑھتا جا رہا ہے۔ جے این یو، جامعہ ملیہ کے بعد اب دہلی یونیورسٹی (ڈی یو) میں دستاویزی فلم کی نمائش کو لے کر ہنگامہ جاری ہے۔ جمعہ کو دہلی یونیورسٹی میں آرٹس کی فیکلٹی کے باہر کافی ہنگامہ ہوا۔ دہلی پولیس نے اس سے قبل احتجاج کرنے والے طلباء اور این ایس یو آئی کے ارکان کو حراست میں لیا، بعد ازاں پولیس نے بھیم آرمی کی طلبہ یونین کے کچھ ارکان کو بھی حراست میں لے لیا۔ وہیں دہلی پولیس نے کل 24 لوگوں کو حراست میں لیا ہے۔ NSUI-KSU کی جانب سے فیکلٹی آف آرٹس میں نریندر مودی پر بی بی سی کی دستاویزی فلم کی اسکریننگ کے اعلان کے بعد دفعہ 144 نافذ کر دی گئی ہے۔ بی بی سی کی دستاویزی فلم انڈیا: دی مودی کویسچن 2002ء کے گجرات مسلم نسل کشی پر مبنی ہے، اس وقت نریندر مودی ریاست کے وزیر اعلیٰ تھے۔ کانگریس کی طلبہ تنظیم این ایس یو آئی نے جمعہ کو دہلی یونیورسیٹی میں دستاویزی فلم دکھانے کا اعلان کیا تھا۔ جائے وقوع پر بڑی تعداد میں سیکورٹی اہلکار تعینات کئے گئے۔

اے ڈی سی پی نارتھ دہلی رشمی شرما نے کہا کہ ہمیں اس معاملہ میں احتیاطی کارروائی کرنی ہوگی جس سے امن عامہ اور نظامِ امن میں خلل پڑتا ہے، یہ صرف احتیاطی کارروائی ہے۔ ڈی سی پی نارتھ ساگر سنگھ کالسی نے کہا کہ ہم دہلی یونیورسٹی کے آرٹ فیکلٹی گیٹ کے باہر کھڑے ہیں۔ یہاں ٹریفک بھی رواں دواں ہے، سب کچھ نارمل ہے۔ کچھ لوگ بی بی سی کی ممنوعہ دستاویزی فلم چلانے کی کوشش کرنے کے لئے یہاں آئے تھے، انہیں کئی بار انکار کیا گیا، سمجھایا گیا لیکن جب وہ نہ مانے تو انہیں پولیس نے حراست میں لے لیا۔ اس کے بعد انہوں نے اندر سے سکریننگ کرنے کی کوشش کی۔ ہمیں بتایا گیا کہ اندر سے حالات مزید خراب ہو سکتے ہیں، اس لئے کچھ لوگوں کو اندر سے بھی حراست میں لیا گیا ہے، اب سب کچھ نارمل ہے۔