پیٹرولیم مصنوعات کی قیمتوں میں اضافے سے مہنگائی کا نیا طوفان آئے گا، نسرین جلیل

اسلام ٹائمز۔ متحدہ قومی موومنٹ (ایم کیو ایم) پاکستان کی ڈپٹی کنوینر نسرین جلیل نے کہا ہے کہ پیٹرولیم مصنوعات کی قیمتوں میں اضافے سے مہنگائی کا نیا طوفان آئے گا۔ کراچی سے جاری اپنے ایک بیان میں نسرین جلیل نے کہا کہ پیٹرولیم مصنوعات کی قیمتوں میں اضافے کا اثر براہ راست روز مرہ استعمال کی اشیا پر پڑے گا۔ ان کا کہنا تھا کہ ملک کو معاشی مشکلات سے نکالنے کے لئے سارا بوجھ عوام پر ڈالنا ظلم ہے۔ انہوں نے مطالبہ کیا کہ حکومت ورکنگ کلاس پر ٹیکس حملے کرنے کے بجائے فی الفور زرعی ٹیکس نافذ کرے۔ ڈپٹی کنوینر ایم کیو ایم پاکستان نے کہا کہ زرعی ٹیکس نہ لگانا پاکستان اور عوام سے دشمنی کے مترادف ہے، کمر توڑ مہنگائی نے عوام کا جینا محال کردیا ہے۔