اسلام ٹائمز۔ جماعت اسلامی سندھ کے قائم مقام امیر پروفیسر نظام الدین میمن نے کہا ہے کہ ایران سعودی عرب سفارتی تعلقات میں بحالی پر اتفاق خطے کیلئے اہم اور امت کیلئے خوش آئند ہے، خلافت کے بعد امت مسلمہ کے اتحاد و اتفاق کی اہمیت کہیں زیادہ ہے، مسلمان ممالک کو باہمی تعاون اور وسیع النظری کے ساتھ ایک جسم جیسی فضا بنانے کی ضرورت ہے۔ اپنے ایک بیان میں پروفیسر نظام الدین میمن نے کہا کہ پاکستانی خارجہ پالیسی بھی مسلم ممالک کے درمیان تعلقات کے پل جیسی ہونی چاہیے، ایران سعودی تعلقات میں بحالی معاشی و سیاسی دائرہ میں مثبت اثرات ڈالے گی۔ انہوں نے کہا کہ جماعت اسلامی مسلم ممالک کے درمیان بہترین برادرانہ تعلقات کے ساتھ اتحاد امت کے تصور کو دنیا کے سامنے مثالی صورت پیش کرنے کی خواہاں ہے۔