ناصر بٹ کا برطانوی شہریت چھوڑ کر پنجاب اسمبلی انتخابات میں حصہ لینے کا اعلان

اسلام ٹائمز۔ مسلم لیگ نون کے رہنماء ناصر بٹ نے برطانوی شہریت چھوڑ کر پنجاب اسمبلی کے انتخابات میں حصہ لینے کا اعلان کر دیا ہے۔ لندن میں پریس کانفرنس کرتے ہوئے ناصر بٹ کا کہنا تھا کہ ان کے خلاف جھوٹے مقدمات خارج ہوگئے، تاہم پنجاب اسمبلی کے انتخابات میں حصہ لینے کیلئے پی پی 16 میں کاغذات نامزدگی جمع کرا دیئے ہیں۔ انہوں نے مزید کہا کہ پنجاب اور خیبر پختونخوا میں الیکشن جیتیں گے، نواز شریف بھی جلد پاکستان میں ہوں گے۔

واضح رہے کہ پنجاب اسمبلی کے انتخابات کے لیے 30 اپریل کو میدان سجے گا، جس کے لئے مختلف سیاسی جماعتوں کے رہنماؤں کی جانب سے کاغذات نامزدگی جمع کرائے جانے کا سلسلہ جاری ہے۔ سینیئر نائب صدر و چیف آرگنائزر مریم نواز اور مسلم لیگ نون کے سینیئر رہنماء و سابق وزیراعلیٰ پنجاب حمزہ شہباز نے بھی پنجاب اسمبلی کے انتخابات کے لیے اپنے کاغذات نامزدگی جمع کرائے ہیں۔