QR Code

بلوچستان میں عوام کی سہولیات کیلئے 65 سستے بازار لگائے ہیں، بابر یوسفزئی

28 Mar 2023 20:12

کوئٹہ میں پریس کانفرنس کرتے ہوئے ترجمان وزیراعلیٰ نے کہا کہ ماہ رمضان میں عوام کو ریلیف کی فراہمی کیلئے اقدامات اٹھا رہے ہیں۔

اسلام ٹائمز۔ وزیراعلیٰ بلوچستان کے ترجمان بابر یوسفزئی نے کہا ہے کہ ماہ رمضان میں عوام کو ریلیف کی فراہمی کیلئے اقدامات اٹھا رہے ہیں۔ حکومت بلوچستان کی جانب سے صوبے میں ایک لاکھ غریب افراد کو راشن دیا جائے گا۔ جبکہ رمضان المبارک کے موقع پر بلوچستان میں عوام کی سہولیات کیلئے 65 سستے بازار لگائے ہیں۔ یہ بات انہوں نے پریس کانفرنس کے دوران میڈیا سے گفتگو کرتے ہوئے کہی۔ انہوں نے کہا کہ صوبائی دارلحکومت کوئٹہ میں 4 سستے بازار لگائے گئے ہیں۔ وزیراعلی بلوچستان نے موجودہ پی ایس ڈی پی پر تشویش کا اظہار کیا۔ وفاقی حکومت نے بلوچستان کیلئے مختص فنڈز پر کٹ لگایا ہے۔ جس پر حکومت بلوچستان نے وفاق سے احتجاج کا فیصلہ کیا ہے۔ انہوں نے کہا کہ اب تک ایک لاکھ 15 ہزار سستے آٹے کے بیگز فراہم کئے جارہے ہیں۔ پنجاب حکومت سے گندم خریدنے کیلئے پیسے دے دئیے مگر اب تک گندم نہیں ملا۔ انکا مزید کہنا تھا کہ 31 مئی تک سریاب روڈ اور سبزل روڈ کا کام مکمل کرنے والے ہیں۔

خبر کا کوڈ: 1049242