صرف غاصب اسرائیل ہی ایک ایسا مقام ہے کہ جسکی سلامتی کیلئے امریکہ سچے دل کیساتھ کوشاں ہے، ناصر کنعانی

اسلام ٹائمز۔ ایرانی وزارت خارجہ کے ترجمان ناصر کنعانی نے امریکی حکومت کی دہشتگرد و قابض ماہیت سے پردہ اٹھاتے ہوئے لکھا ہے کہ دنیا بھر میں صرف ایک ہی ایسی رژیم ہے کہ جس کی سلامتی کے لئے امریکہ سچے دل سے کوشاں ہے جبکہ وہ بھی غاصب و قابض صیہونی رژیم اسرائیل ہے! اس حوالے سے انگریزی زبان میں جاری ہونے والے اپنے ٹوئٹر پیغام میں ناصر کنعانی نے لکھا کہ غاصب صیہونی رژیم کے روز افزوں بحرانوں پر سخت پریشان اس کے سوتیلے باپ (امریکہ) کا کہنا ہے کہ امریکہ، اسرائیلی رہنماؤں سے پرزور اپیل کرتا ہے کہ وہ جلد از جلد ایکدوسرے کے ساتھ سمجھوتا اور راضی نامہ کر لیں کیونکہ موجودہ شدید بحران سے سلامتی کے ساتھ ساتھ گزرنے کے لئے اسرائیل اور اس کے شہریوں کے پاس یہی بہترین رستہ ہے! اپنے پیغام کے آخر میں ایرانی وزارت خارجہ کے ترجمان نے لکھا کہ صرف اسرائیل ہی وہ واحد مقام ہے کہ جس کی سلامتی کے لئے امریکہ سچے دل کے ساتھ پرعزم ہے۔ 
اس حوالے سے گزشتہ روز جاری ہونے والے اپنے متعدد ٹوئٹر پیغامات میں ناصر کنعانی نے غاصب صیہونی رژیم اسرائیل میں جاری شدید احتجاجی مظاہروں کی تصاویر و ویڈیو کلپس منسلک کرتے ہوئے لکھا تھا کہ جنگی جنون کے حامل ناجائز قابض عناصر کا گھر اس وقت شعلوں میں گھرا ہوا ہے جبکہ اپنی طاقت میں اضافے اور جان بچانے کی کوششوں پر مبنی اسرائیلی رژیم کے مجرم وزیراعظم کے اقدامات نے فلسطینی اراضی پر ناجائز قبضہ کرنے والوں کے درمیان بیمثال احتجاجی مظاہروں اور گلی کوچوں کی لڑائی چھیڑ دی ہے! انہوں نے لکھا کہ یوں غاصب صہیونی معاشرے کی اندرونی دراڑیں آج کسی بھی قبلی وقت سے بڑھ کر عیاں ہو چکی ہیں جبکہ اس دوران ناجائز قبضے اور نسل پرستی پر مبنی جعلی (صیہونی) رژیم کو ''جمہوریت'' کے پردے میں سہارا دینے کی امریکہ و مغربی ممالک اور خصوصا برطانیہ کی کوششیں انتہائی مضحکہ خیز ہیں!