QR Code
پنجاب میں سیاسی بنیادوں پر کی گئیں تعیناتیاں منسوخ کرنے کی منظوری
1 Apr 2023 14:46
کابینہ نے پاکستان تحریک انصاف کے چیئرمین عمران خان کے پولیس کے خلاف ان کے قتل کی سازش کے الزامات کی تحقیقات کے لیے ایک کمیشن کی تشکیل کی بھی منظوری دی۔
اسلام ٹائمز۔ پنجاب کی نگران کابینہ نے پنجاب سوشل سیکیورٹی اینڈ ہیلتھ مینجمنٹ کمپنی کے بورڈ آف ڈائریکٹرز لائیو اسٹاک اینڈ ڈیری ڈیولپمنٹ میں سیاسی بنیادوں پر کی گئیں تعیناتیاں منسوخ کرنے کی منظوری دے دی۔ نجی ٹی وی کے مطابق نگران وزیراعلیٰ محسن نقوی کی زیر صدارت کابینہ کا اجلاس ہوا۔اجلاس میں شوگر فیکٹریز کنٹرول ایکٹ 1950 میں ترامیم متعارف کرانے، بجلی کی تقسیم کار کمپنیوں کو صوبے کے حوالے کرنے کے حوالے سے ٹرانزیکشن ایڈوائزر کی تعیناتی کی بھی منظوری دی گئی۔
پنجاب میڈیم ٹرم فنانشل فریم ورک (بجٹ اسٹریٹجی) رولز 2023 اور پنجاب انڈیسریل کوآپریٹو سوسائٹی ایکٹ 1993 میں ترامیم کی منظوری بھی دی۔ کابینہ نے اوقاف بورڈ کی جائیداد ہتھیانے پر سزا کے خلاف سیکریٹری کے علاوہ دیگر اتھارٹیز کو اپیل کا حق دینے کا فیصلہ کیا۔ شیخوپورہ، ٹوبہ ٹیک سنگھ اور چنیوٹ میں محکمہ اسکول ایجوکیشن میں ترقیاتی اسکیموں کو مکمل کرنے کے لیے فنڈز کی منظوری دی گئی۔ کابینہ نے پاکستان تحریک انصاف کے چیئرمین عمران خان کے پولیس کے خلاف ’ان کے قتل کی سازش‘ کے الزامات کی تحقیقات کے لیے ایک کمیشن کی تشکیل کی بھی منظوری دی۔
خبر کا کوڈ: 1049951