QR Code

سپریم کورٹ نے فل کورٹ کے ذریعے راستہ نہ نکالا تو پھر کوئی راستہ نہیں نکلنا، خورشید شاہ

1 Apr 2023 19:29

ایک بیان میں وفاقی وزیر نے کہا کہ سیاسی بحران کی ذمہ داری کا حقیقی تعین کرنا ہے تو لیفٹیننٹ جنرل ریٹائرڈ پاشا سے شروع کریں، جنرل ریٹائرڈ پاشا، جنرل ریٹائرڈ ظہیر اسلام، جنرل ریٹائرڈ فیض نے عمران خان کی آبیاری کی۔

اسلام ٹائمز۔ پاکستان پیپلز پارٹی کے رہنما اور وفاقی وزیر خورشید احمد شاہ نے کہا ہے کہ ہم بند گلی میں پہنچ چکے ہیں، اگر کوئی راستہ بن سکتا تو وہ فل کورٹ ہے، تجربے سے بتا رہا ہوں وقت بہت کم ہے، حل نہ نکالا تو کچھ بھی ہو سکتا۔ ایک بیان میں خورشید شاہ نے کہا کہ سیاسی بحران پیچھے رہ گیا، آئینی بحران نے ملک کو لپیٹ میں لے لیا، آئینی و سیاسی بحران کے حل کے لئے نہ کوئی ادارہ بچا، نہ شخصیت۔ خورشید شاہ نے کہا کہ فل کورٹ کے ذریعے عدلیہ آئینی بحران سے نکلنے کی راہ تلاش کرے، آئینی و سیاسی معاملات بند گلی میں چلے جائیں تو گھڑی کی ٹک ٹک شروع ہو جاتی، اگر کچھ غلط ہوا تو اہم ادارے ذمہ دار ہوں گے۔

انہوں نے کہا کہ ضد اور انا نے ملک کو اس دلدل تک پہنچایا ہے، سیاسی بحران کو حل کرنے کی بجائے سنگین آئینی بحران پیدا کردیا گیا۔ پیپلز پارٹی کے رہنما نے کہا کہ سیاسی بحران کی ذمہ داری کا حقیقی تعین کرنا ہے تو لیفٹیننٹ جنرل ریٹائرڈ پاشا سے شروع کریں، جنرل ریٹائرڈ پاشا، جنرل ریٹائرڈ ظہیر اسلام، جنرل ریٹائرڈ فیض نے عمران خان کی آبیاری کی، ان کو مسلط کرنا ہی ملک کو درپیش خرابی کی اصل بنیاد ہے۔ انہوں نے کہا کہ سپریم کورٹ نے فل کورٹ کے ذریعے راستہ نہ نکالا تو پھر کوئی راستہ نہیں نکلنا، بار بار کہہ رہا ہوں، اب صرف فل کورٹ، صرف فل کورٹ ورنہ صرف پچھتاوا۔

خبر کا کوڈ: 1050022