QR Code

اگر مذاکرات ہوئے تو صرف الیکشن کے معاملے پر ہونگے

جن کو چور اور کرپٹ کہتا ہوں، خود مذاکرات میں انکے ساتھ نہیں بیٹھوں گا، عمران خان

2018ء کے انتخابات میں ہماری نشستیں جان بوجھ کر کم کی گئیں، تاکہ کنٹرول کیا جا سکے

2 Apr 2023 14:39

غیر ملکی ٹی وی چینل کو انٹرویو دیتے ہوئے پاکستان تحریک انصاف کے چیئرمین کا کہنا تھا کہ اسوقت ملک کا سب سے بڑا مسئلہ 90 روز میں انتخابات ہیں، ابھی انتخابات نہیں ہوئے تو اکتوبر میں انتخابات کے امکانات کم ہیں۔

اسلام ٹائمز۔ پاکستان تحریک انصاف کے چیئرمین اور سابق وزیراعظم عمران خان نے کہا ہے کہ وہ حکومت کے ساتھ مذاکرات میں نہیں بیٹھیں گے، اگر بات چیت ہوئی تو پارٹی کے دیگر اراکین کریں گے۔ غیر ملکی ٹی وی چینل کو انٹرویو دیتے ہوئے عمران خان کا کہنا تھا کہ جن کو چور اور کرپٹ کہتا ہوں، ان کے ساتھ نہیں بیٹھوں گا، اگر بات چیت ہوئی تو پارٹی کے دیگر اراکین کریں گے، اس وقت ملک کا سب سے بڑا مسئلہ 90 روز میں انتخابات ہیں، ابھی انتخابات نہیں ہوئے تو اکتوبر میں انتخابات کے امکانات کم ہیں۔ پی ٹی آئی چیئرمین نے کہا کہ اگر مذاکرات ہوئے تو صرف الیکشن کے معاملے پر ہوں گے، انتخابات کی طرف نہیں جاتے تو پھر مذاکرات کا کوئی فائدہ نہیں، میرا کسی سے کوئی رابطہ نہیں، تاہم انتخابات پر بات کرنے کو تیار ہوں۔

انہوں نے کہا کہ اپنے مفادات کیلئے سپریم کورٹ کو تقسیم کرنا نواز شریف کی پرانی روش ہے، سپریم کورٹ کا فیصلہ نہ ماننے کا مطلب ہے کہ ملک میں آئین و قانون ختم ہوگیا، لیکن پوری قوم سپریم کورٹ کے ساتھ کھڑی ہوگی، 2018ء کے انتخابات میں ہماری نشستیں جان بوجھ کر کم کی گئیں، تاکہ کنٹرول کیا جا سکے۔ سابق وزیراعظم عمران خان نے یہ بھی دعویٰ کیا کہ ہمیں معلوم ہے کہ ہمارے لوگوں کو کون لے کر گیا ہے۔ چیئرمین تحریک انصاف نے پی ڈی ایم کی طرف سے سپریم کورٹ کے تین رکنی بنچ کا فیصلہ نہ ماننے کے اعلان پر شدید تنقید کی اور کہا کہ ان کی جماعت عدالت عظمی کا بھرپور ساتھ دے گی۔

خبر کا کوڈ: 1050144