اسلام ٹائمز۔ پاکستان سنی تحریک کے سربراہ محمد ثروت اعجاز قادری نے کہا ہے کہ آئین و قانون کی بالادستی کو ہر حال میں یقینی بنایا جائے، مستحکم اور خوشحال پاکستان کیلئے تمام اکائیوں ایک ہو کر جدوجہد کرنے کی ضرورت ہے۔ اپنے ایک بیان میں ثروت اعجاز قادری نے کہا کہ تمام مذہبی و سیاسی جماعتیں پاکستان کے استحکام اور دہشتگردی کے خاتمے کیلئے اپنا کردار ادا کریں، مہنگائی و بے روزگاری کا خاتمہ اور عوامی مسائل کے حل کیلئے تمام جماعتوں کو یکجا ہو کر جدوجہد کرنا ہوگی۔ انہوں نے کہا کہ غریب عوام کے مسائل کو ہنگامی بنیادوں پر حل نہ کیا گیا، تو ان میں احساس محرومی جنم لے گا، جو کسی طور بھی ملک و جمہوریت کے مفاد میں نہیں ہے۔ انہوں نے کہا کہ پاکستان کے عظیم مفاد میں اختلافات کو بالائے طاق رکھ کر تعمیری سوچ استوار کرنی ہوگی، غربت کے خاتمے کیلئے حکومتی اقدامات نہ ہونے کے مترادف ہیں، حکومت زبانی جمع خرچ یا میڈیا ٹرائل کی بجائے عوام کو ریلیف دینے کیلئے عملی اقدامات کرے۔