امام خمینیؒ کے افکار معاشرے کو زندگی دینے والے افکار ہیں، علامہ مرزا یوسف حسین

اسلام ٹائمز۔ دعا کمیٹی صوبائی سکریٹریٹ مجلس وحدت مسلمین سندھ کے زیر اہتمام ہفتہ وار مرکزی اجتماعی دعائے توسل و مجلس برسی ایصال ثواب بانی انقلاب اسلامی حضرت آیت اللہ العظمیٰ سید امام خمینی رضوان اللہ تعالی علیہ محفل شاہ خراسان روڈ کراچی پر منعقد ہوئی، جس میں تلاوت دعائے توسل کی سعادت مولانا مرزا یوسف حسین نے حاصل کی، سلام عقیدت ثاقب رضا ثاقب نے پیش کیا اور مجلس برسی امام خمینیؒ سے بزرگ عالم دین علامہ مرزا یوسف حسین نے خطاب کرتے ہوئے امام خمینی رحمۃ اللہ علیہ کی زندگی پر روشنی ڈالی اور کہا کہ امام خمینیؒ ایک الہی شخصیت تھے، امام خمینیؒ کے افکار معاشرے کو زندگی دینے والے افکار ہیں، ان کی فکر مسلمان امتوں کے لئے نجات کا باعث ہے، ضرورت اس امر کی ہے کہ امام خمینیؒ کے نظریات کے پرچار کے لئے اقدامات کئے جائیں۔

علامہ مرزا یوسف حسین نے مزید کہا کہ امام خمینیؒ نے انقلاب کا درس کربلا سے حاصل کیا، کربلائی فکر دراصل امام زمانہ (عج) کے قیام کی فکر ہے۔ اس موقع پر مولانا مختار علی، مظاہر حسین ہاشمی، صادق حسین زیدی، ضامن عباس، محمد رضا، جاوید حسین نقوی، عامر کاظمی، شیخ نذیر علی، علی عباس، اقبال کاظمی اور دیگر نے شرکت کی۔ نوحہ خوانی محمد علی جلالوی نے کی، آخر میں امام خمینیؒ، شہید قائد علامہ عارف حسین الحسینیؒ، شہدائے پاکستان و ملت جعفریہ اور مرحومین کے ایصال ثواب کیلئے فاتحہ خوانی کی گئی اور بیمار مریضوں کی جلد شفایابی اور اسیران ملت جعفریہ کی رہائی کیلئے خصوصی دعا کی گئی۔