پارلیمانی سیشن کے ایجنڈا کے بارے میں کسی کو کوئی معلومات نہیں ہے، کانگریس

اسلام ٹائمز۔ مرکز نے پارلیمنٹ کے خصوصی اجلاس سے ایک دن قبل یعنی 17 ستمبر کو کل جماعتی اجلاس میٹنگ بلائی ہے۔ اس آل پارٹی اجلاس کو اہم سمجھا جا رہا ہے کیونکہ حکومت نے ابھی تک پارلیمنٹ کے خصوصی اجلاس کا ایجنڈا واضح نہیں کیا ہے۔ پارلیمنٹ کا خصوصی اجلاس 18 سے 22 ستمبر تک ہوگا۔ پارلیمنٹ کے خصوصی اجلاس کے ایجنڈے کے بارے میں معلومات نہ دینے پر کانگریس مودی حکومت پر حملہ کر رہی ہے۔ کانگریس نے سوال اٹھایا کہ سیشن شروع ہونے میں صرف چند دن باقی ہیں لیکن شاید ’ایک شخص‘ کے علاوہ کسی کو ایجنڈے کے بارے میں کوئی معلومات نہیں ہے۔ پارٹی کے جنرل سکریٹری جے رام رمیش نے ماضی میں منعقدہ پارلیمنٹ کی کچھ خصوصی میٹنگوں کا بھی ذکر کیا اور کہا کہ خصوصی میٹنگوں سے پہلے ایجنڈے کے بارے میں معلومات دستیاب تھیں۔

مہاراشٹر پردیش کانگریس کے صدر نانا پٹولے نے الزام لگایا کہ پارلیمنٹ کے آئندہ خصوصی اجلاس کا ایجنڈا ممبئی کو ریاست سے الگ کرنا اور اسے مرکز کے زیر انتظام علاقہ قرار دینا ہے۔ دراصل مودی حکومت نے 18 سے 22 ستمبر تک بلائے گئے خصوصی اجلاس کا ایجنڈا ابھی تک ظاہر نہیں کیا ہے۔ جس کی وجہ سے سیشن کے حوالے سے طرح طرح کی قیاس آرائیاں کی جارہی ہیں۔ پارلیمنٹ کا خصوصی اجلاس 18 ستمبر سے پرانی عمارت میں شروع ہونے جا رہا ہے۔ توقع ہے کہ 19 ستمبر کو گنیش چترتھی پر پارلیمنٹ کی کارروائی کو نئی عمارت میں منتقل کیا جائے گا۔