اداروں کا گلا گھونٹ کر جمہوریت پر منظم حملہ کیا گیا، ملکارجن کھڑگے

اسلام ٹائمز۔ انڈین نیشنل کانگریس کے صدر ملکارجن کھڑگے نے عالمی یوم جمہوریت پر کہا کہ حالیہ دنوں میں ہمارے آئین بنانے والوں کی محنت سے بنائے گئے اداروں کا گلا گھونٹ کر جمہوریت پر منظم حملہ کیا گیا ہے۔ انہوں نے بھارتی عوام پر زور دیا کہ وہ پارلیمانی جمہوریت کے اخلاق کے تحفظ کا عہد کریں۔ انہوں نے ایکس پر ایک پوسٹ میں پہلے وزیراعظم پنڈت جواہر لال نہرو کی سطروں کا حوالہ دیتے ہوئے کہا ''جمہوریت کا مطلب ہے رواداری، نہ صرف ان لوگوں کے لئے جو ہم سے متفق ہیں، بلکہ ان کے لئے بھی جو ہم سے متفق نہیں ہیں‘‘۔ بی جے پی کا نام لئے بغیر اس پر طنز کرتے ہوئے ملکارجن کھڑگے نے کہا کہ لوگوں کی مرضی اور ادارے، یہ جمہوریت کے پیدا ہونے اور اس کے پھلنے پھولنے میں مدد کرتے ہی۔

انہوں نے مزید کہا کہ حالیہ دنوں میں ہمارے اداروں کا گلا گھونٹ کر جمہوریت پر ایک منظم حملہ کیا گیا، جسے ہمارے آئین کے معماروں نے بڑی محنت سے بنایا ہے۔ راجیہ سبھا میں قائد حزب اختلاف نے کہا کہ عالمی یوم جمہوریت پر آئیے ہم عہد کریں کہ ہم اپنے آزاد اداروں میں موجود پارلیمانی جمہوریت کے اخلاق کی حفاظت کریں گے۔ ان کا یہ بیان 18 سے 22 ستمبر تک پارلیمنٹ کے پانچ روزہ خصوصی اجلاس سے پہلے سامنے آیا ہے۔ کانگریس نے پہلے اپوزیشن کو پارلیمنٹ میں بولنے کی اجازت نہ دینے پر حکومت کو نشانہ بنایا تھا۔