پیٹرول قیمتوں میں اضافہ، سارا بوجھ عوام پر، جاگیرداروں پر ٹیکس کیوں نہیں لگایا جاتا، حافظ نعیم الرحمن

اسلام ٹائمز۔ امیر جماعت اسلامی کراچی حافظ نعیم الرحمن نے نگراں حکومت کی جانب پیٹرول کی قیمتوں میں تیسری مرتبہ اور مزید 26 روپے اضافے اور ایک ماہ میں پیٹرول کی قیمت میں 58 روپے 48 پیسے اور ڈیزل کی قیمت میں 55 روپے 78 پیسے کے اضافے کے ظالمانہ فیصلے کی شدید مذمت کرتے ہوئے کہا ہے کہ نگراں حکومت آئی ایم ایف کے کہنے پر پیٹرولیم مصنوعات کی قیمتوں میں تو بار بار اضافہ کرکے سارا بوجھ عوام پر ڈال رہی ہے لیکن جاگیرداروں اور وڈیروں پر ٹیکس لگانے اور حکمران ٹولے و طبقہ اشرافیہ کی مراعات  اور ان کو مفت بجلی و پیٹرول کی فراہمی ختم کرنے پر تیار نہیں، نگراں حکومت بتائے کہ سارا بوجھ عوام پر ڈالنے کے بجائے وڈیروں و جاگیرداروں پر ٹیکس کیوں نہیں لگایا جاتا؟ آئی ایم ایف پیٹرول و بجلی قیمتیں کم کرنے کی اجازت تو نہیں دے رہا کیا وڈیروں و جاگیرداروں پر ٹیکس لگانے سے بھی اس نے روکا ہے؟

حافظ نعیم الرحمن نے مطالبہ کیا کہ اضافے کا ظالمانہ فیصلہ واپس لیا جائے، پیٹرول کی قیمتیں کم کی جائیں، بجلی کے ظالمانہ و بھاری بلوں اور ٹیکسوں کی بھر مار سے عوام کو نجات دلائی جائے، وڈیروں اور جاگیرداروں پر ٹیکس لگایا جائے، حکمرانوں اور وزیروں سمیت اعلیٰ افسران اور مراعات یافتہ طبقات کو مفت بجلی و پیٹرول دینے کا سلسلہ بند کیا جائے۔ حافظ نعیم الرحمن نے کہا کہ نگراں حکومت کا حالیہ ظالمانہ اضافہ سابقہ حکومت کی عوام دشمن پالیسیوں کا تسلسل اور نااہلی کا ثبوت ہے، بجلی و پیٹرول کی قیمتوں میں اضافے اور بڑھتی ہوئی مہنگائی کے باعث غریب اور متوسط گھرانے کے افراد  غربت کی لکیر سے مزید نیچے آگئے ہیں، بڑھتی ہوئی مہنگائی اور بجلی و پیٹرول قیمتوں میں ہوشربا اضافے اور حکومت کی عوام دشمن پالیسیوں و اقدامات کے خلاف جماعت اسلامی کی احتجاجی اور عوامی تحریک جاری ہے۔

ان کا کہنا تھا کہ سراج الحق کی اپیل پر چاروں صوبوں کے گورنر ہاؤسز پر احتجاجی دھرنے دیئے جا رہے ہیں۔ کراچی میں گورنر ہاؤس سندھ پر 6 اکتوبر کو احتجاجی دھرنا دیا جائے گا۔ انہوں نے کہا کہ پیٹرول کی قیمتوں میں اضافے سے ہر چیز مہنگی ہو جاتی ہے، موجودہ قیمتیں ملکی تاریخ کی بلند ترین شرح پر پہنچ گئی ہیں، ہونا تو یہ چاہیئے تھا کہ پیٹرول اور بجلی کی قیمتیں کم کرکے عوام کو ریلیف دیا جاتا لیکن نگراں حکومت عوام کو ریلیف دینے کے بجائے مسلسل پیٹرول کی قیمتوں میں اضافہ کررہی ہے، عوام پہلے ہی بجلی کے بھاری بلوں سے پریشان ہیں، پیٹرول کی قیمت میں ہوشر با اضافہ کسی صورت برداشت نہیں کر سکتے، حکومت آٹا اور چینی مافیا کے خلاف بھی کوئی قرار واقعی کارروائی کرسکی نہ ان کی قیمتیں کم کراسکی، اشیاء صرف میں کوئی چیز ایسی نہیں ہے کہ جس کی قیمتیں نہ بڑھی ہوں۔