جسٹس فائز عیسیٰ آج چیف جسٹس پاکستان کی حیثیت سے حلف اٹھائیں گے

اسلام ٹائمز۔ سپریم کورٹ کے سینئر ترین جج جسٹس قاضی فائز عیسٰی آج سپریم کورٹ کے چیف جسٹس کی حیثیت سے حلف اٹھائیں گے۔ وہ 29 ویں چیف جسٹس پاکستان ہوں گے۔ جسٹس قاضی فائز عیسٰی نے 5 ستمبر 2014ء کو سپریم کورٹ آف پاکستان کے جج کی حیثیت سے حلف اٹھایا۔ 2019ء میں صدارتی ریفرنس کے بعد سینئر ترین جج ہونے کے باوجود انہیں 3 سال سے کسی آئینی مقدمے کے بینچ میں شامل نہیں کیا گیا۔ جسٹس فائز عیسٰی نے سپریم کورٹ پریکٹس اینڈ پروسیجر ایکٹ پر حکم امتناع کے بعد اپریل سے معمول کے بینچز میں بیٹھنے سے معذرت بھی کی، ان کی زندگی اور کیریئر پر نظر ڈالتے ہیں۔

  26 اکتوبر 1959ء کو کوئٹہ میں پیدا ہونے والے جسٹس قاضی فائز عیسٰی کے والد مرحوم قاضی محمد عیسیٰ آف پشین قیامِ پاکستان کی تحریک کے سرکردہ راہنما اور قائداعظم محمد علی جناح کے قریبی ساتھی تھے۔ کوئٹہ سے اپنی ابتدائی تعلیم مکمل کرنے کے بعد جسٹس قاضی فائز عیسیٰ نے کراچی میں کراچی گرامر اسکول سے اے اور او لیول مکمل کیا اور پھر قانون کی اعلیٰ تعلیم حاصل کرنے کیلئے لندن چلے گئے جہاں انہوں نے انز آف کورٹ اسکول آف لاء سے بار پروفیشنل اگزامینیشن مکمل کیا۔

 جسٹس قاضی فائز عیسیٰ 30 جنوری 1985ء کو بلوچستان ہائی کورٹ میں اور مارچ 1998ء میں ایڈووکیٹ سپریم کورٹ بنے، 3 نومبر 2007ء کو ملک میں ایمرجنسی کے اعلان کے بعد انہوں نے فیصلہ کیا کہ وہ اپنے حلف کی خلاف ورزی کرنے والے ججز کے سامنے پیش نہیں ہوں گے۔ اسی دوران سپریم کورٹ کی جانب سے 3 نومبر کے فیصلے کو کالعدم قرار دیے جانے کے بعد اس وقت کے بلوچستان ہائیکورٹ کے ججز نے استعفیٰ دے دیا تو 5 اگست  2009ء کو جسٹس قاضی فائز عیسیٰ کو براہ راست بلوچستان ہائیکورٹ کا جج مقرر کردیا گیا۔

 جسٹس قاضی فائز عیسیٰ بلوچستان ہائیکورٹ اور سپریم کورٹ میں جج مقرر ہونے سے قبل 27 سال تک وکالت کے شعبے سے وابستہ رہے۔ انہیں مختلف مواقع پر ہائیکورٹس اور سپریم کورٹ کی جانب سے متعدد مشکل کیسز میں معاونت کیلئے بھی طلب کیا جاتا رہا۔ بین الاقوامی ثالثی کو بھی دیکھتے رہے۔ جسٹس قاضی فائز عیسیٰ نے 5 ستمبر 2014ء کو سپریم کورٹ آف پاکستان کے جج کی حیثیت سے حلف اٹھایا۔

نامزد چیف جسٹس، جسٹس قاضی فائز عیسٰی سپریم کورٹ میں 184/3 کے اختیارات اور بینچز کی تشکیل کے معاملے پر حکومت کی جانب سے کی گئی قانون سازی، سپریم کورٹ پریکٹس اینڈ پروسیجر ایکٹ پر چیف جسٹس عمر عطا بندیال کی جانب سے عمل درآمد نہ کرنے اور حکم امتناع دینے پر بطور احتجاج گزشتہ 5 ماہ سے کوئی مقدمہ نہیں سن رہے اور چیمبر ورک میں مصروف رہے۔ جسٹس قاضی فائز عیسیٰ کا بطور چیف جسٹس پاکستان دور بہت مختصر ہوگا، وہ 25 اکتوبر 2024ء کو عہدے سے ریٹائر ہو جائیں گے۔