کوئٹہ، انتظامیہ کی غیرقانونی رکشوں کیخلاف کارروائیاں

اسلام ٹائمز۔ ضلعی انتظامیہ کی جانب سے غیر قانونی اور جعلی نمبر کے رکشوں کے خلاف کارروائی کا آغاز کر دیا گیا ہے۔ سیکرٹری ریجنل ٹرانسپورٹ اتھارٹی کوئٹہ وحید شریف عمرانی نے اسپنی روڈ سی پیک چوک پر غیر قانونی اور دو نمبر جعلی رکشوں کے خلاف کارروائی کرتے ہوئے 05 غیر قانونی رکشے بند، جبکہ کاغذات نہ رکھنے، کم عمر اور بغیر ڈرائیونگ لائسنس رکشہ چلانے پر 24 ڈرائیوروں کو چالان بھی کیا۔ اس کارروائی کے دوران ٹریفک پولیس اور آر ٹی اے کا عملہ بھی موجود تھا۔ سیکرٹری ریجنل ٹرانسپورٹ اتھارٹی کوئٹہ وحید شریف عمرانی نے اس موقع پر کہا کہ کوئٹہ شہر میں غیر قانونی رکشوں کے خلاف ٹریفک پولیس کی مدد سے روزانہ کی بنیاد پر اچانک کارروائی کی جارہی ہے، تاکہ شہر میں ٹریفک کے مسائل اور رش میں کمی اور غیر قانونی رکشوں سے چھٹکارا حاصل کیا جاسکے۔

انہوں نے کہا کہ شہر بھر میں غیر قانونی رکشوں کو ڈسٹرکٹ پولیس اور ٹریفک پولیس کی مدد سے نشاندہی کرکے پکڑا جا رہا ہے۔ جس سے شہر میں غیر قانونی اور دو نمبر رکشے نواحی علاقوں میں چل رہے ہیں۔ اس سلسلے میں پولیس کی مدد سے مختلف نواحی علاقوں میں بھی چھاپے مارے جائیں گے۔ انہوں نے کہا کہ کمشنر کوئٹہ ڈویڑن حمزہ شفقات اور ایس ایس پی ٹریفک کوئٹہ کی خصوصی ہدایت پر غیر قانونی اور دو نمبر رکشوں کے تدارک کے لئے تمام پرمٹوں کو کمپیوٹرائزڈ کرنے کا عمل بھی جاری ہے۔ تاکہ غیر قانونی اور دو نمبر رکشوں کے خلاف کارروائی مزید موثر ہوسکے۔ انہوں نے کہا کہ رکشہ ڈرائیور حکومتی ہدایات پر عملدرآمد کو یقینی بنائیں۔ بصورت دیگر خلاف ورزی پر رکشہ بند اور بھاری جرمانے کا سامنا کرنا پڑ سکتا ہے۔ انہوں نے کہا کہ شہر بھر میں غیر قانونی اور دو نمبر رکشوں کے خلاف کارروائیوں میں مزید تیزی لاتے ہوئے آئندہ بھی اسی طرح کی کارروائیاں جاری رہیں گی۔