کمشنر کوئٹہ کا غیر قانونی عمارتوں کیخلاف اقدامات کا حکم

اسلام ٹائمز۔ کوئٹہ ڈویژن کے کمشنر محمد حمزہ شفقات نے شہر میں غیرقانونی عمارات کے خلاف کارروائی کرنے کا عندیہ دے دیا ہے۔ کمشنر کوئٹہ کے دفتر سے جاری ہونے والے ایک سرکلر کے مطابق کمشنر کوئٹہ ڈویژن کے احکامات کی روشنی میں ضلع کوئٹہ میں بغیر این او سی، رہائشی علاقوں میں کمرشل سرگرمیوں، کاروباری پلازوں کی تعمیر کے خلاف کیو ڈی اے، ضلعی انتظامیہ اور میٹروپولیٹن کارپوریشن کو روزانہ کی بنیاد پر کارروائی عمل میں لانے اور اس کی ہفتہ وار رپورٹ پیش کرنے کی ہدایت کی گئی ہے۔ اس سلسلے میں متعلقہ اداروں سے کہا گیا ہے کہ ضلع کوئٹہ کے رہائشی علاقوں میں تجارتی کاروبار چل رہا ہے۔ ان کے خلاف کارروائی کرتے ہوئے روک تھام کو یقینی بنائی جائے۔

اس کے علاوہ کوئٹہ ڈویلپمنٹ پیکج کی زیر تعمیر سڑکوں پر زرعی زمین کو تجارتی عمارات اور رہائشی فلیٹ میں تبدیل کرنے والوں کی بھی جانچ پڑتال کی جائے، جبکہ ڈپٹی کمشنر آفس کوئٹہ سے سکنی سرٹیفکیٹ جاری کرنے کی روک تھام اور زرعی زمین کو تجارتی مقصد کے لئے حیثیت کے تبادلے، زراعت کی زمین کے قریب، ساتھ یا کوئٹہ ترقیاتی پیکج کے زیر تعمیر سڑکوں کی زمین کے ساتھ کمرشل مقاصد کے لئے استعمال کرنے والوں کے خلاف بھی کارروائی عمل میں لائی جائے۔ کوئٹہ میں تجارتی عمارات، پلازہ، فلیٹ کی تعمیر میں بلڈنگ کوڈ، بلوچستان بلڈنگ کنٹرول اور ٹاؤن منصوبہ بندی کے قوانین 2022 کے تحت قابل اختیار اتھارٹی سے منظوری یا این او سی کے بغیر تعمیر کرنے والوں کے خلاف بھی کارروائی عمل میں لائی جائے۔